admin
Thokozile Mbedzi
KULENDODA ethe ngemva kokunatha umagwebu kakhulu yalala enjanjini andubana igxotshwe yisitimela ife eRutenga, eMasvingo ngeviki ephelileyo.
Kubikwa uSipren Ngwenya oleminyaka engu-20 ubenatha emavinkilini eRutenga qede wasukuma eselubhekise ngekhaya.
Uthe efika enjanjini wehluleka ukuchapha ngenxa yokuthi ubedakwe kakhulu wahle wazilalela khonapho.
Umtshayeli wesitimela kubikwa ukunanzelele ukuthi kulomuntu olele kunjanji wazama ukutshaya ihuta kodwa lo osengumuyi ubenathe kakhulu njalo esebubhuqa obukaBhuka, ngokuswelakala kwenhlanhla watshaywa yisitimela wahle wedlula emhlabeni.
Intatheli ixhumane loNkosazana Molita Nkala othe njengezakhamizi bakhakhamele ngalokhu okwenzakeleyo.
“Sasala sithithibele ngemva kokubona umzimba kamuyi usugxotshwe yisitimela, ngempela utshwala nxa buzakwenza umuntu adakwe aze akhohlwe lokuthi usendaweni eyingozi abantu kumele babunathe ngonanzelelo.
“UNgwenya kubikwa ukuthi watshona ebubhuqa emavinkilini wafika enjanjini esesiya ngekhaya wehluleka ukwedlula wahle walala khonapho kwaba yikuphela kwakhe.
“Umtshayeli wazama sibili ukuthi atshaye ihuta kodwa uNgwenya akezwanga lutho ngoba elele ubuthongo khonapho ngenxa yokudakwa.
“Ubelimele kakhulu ekhanda engakhangeleki, abantu bazama ukumusa ekilinika lapho afike waphelela khona,” kutsho uNkszn Nkala.
Isikhulumi samapholisa esabelweni seMasvingo uInspector Kudakwashe Dewa ebuzwa ngodaba lolu uvumile ukuthi lwenzakele wasexwayisa uzulu ukuthi nxa enatha anathe ngonzanelelo.
Online Reporter