Online Reporter
Yintatheli kaMthunywa
KULEKHEHLA elihlala eFox Farm bucwadlana ledolobho lakoBulawayo, eselithwaliswe nzima lunyawo olwagwazwa ngenye indoda eyayicele indawo yokuhlala, kunyanga kaZibandlela.
UMisheck Moyo oleminyaka engu-91 usephila nzima nanko phela unyawo lwakhe luyala ukuphola njalo seluhlephuka.
Ngokutsho kukaKhulu uMoyo kulabantu ababili abafika bezocela indawo yokubeka amakhanda, kungumuntu lentombi yakhe. Ngemva kwesikhatshana intombi yaphuma yanyamalala okwenza lo oyindoda wasala esithi ukhulu nguye okwaziyo lapho ayekhona andubana amgwaze unyawo. Kusukela lapho unyawo lolu luthwalise ukhulu lo amagabha avuzayo nanko phela luyala ukuphola.
Ngaphandle kwalokhu, ukhulu kubikwa uhlala yedwa endlini njalo kulezihlobo ezimphathela ukudla ngesikhathi kumele adle.
Intatheli ivakatshele uKhulu uMoyo ngoLwesibili lapho ethole isimo sakhe sisibi kakhulu, yakhulumisana laye.
“Mntanami ngidinga usizo lokuba ngihambe ngiyefika kubodokotela. Nginje angisahambi, unyawo lungithwalise nzima, angisaphakami, angisenelisi khona lokuhamba, unyawo aluvumi, ungaluthinta ngihlaba umkhosi onzima ebusuku lakho angibuquthi ngobuhlungu engibuzwayo,” kubika uMnu Moyo.
Intatheli zimane zatshaya ucingo esibhedlela okwenze kwakhitshwa i-ambulensi yokuyathwala ukhulu. Okwamanje usesibhedlela se-UBH. Ongabe esenelisa ukusiza uKhulu lo angathinta intatheli zikaMthunywa nanko phela kuzafunakala imali zesibhedlela kanye lokunye okokuthi ukhulu asile kahle. Odokotela bathe akusela ngenye indlela unyawo lolu kumele luqunywe.
