Udinga usizo umntwana olesifo semvukuzane

YiNtatheli kaMthunywa
KULONTOMBAZANA weBinga, esiqintini seMucheni, oleminyaka yokuzawala ngu-15 odinga usizo lokwelatshwa imvukuzane esimenze waqunywa unyawo.

UFamiliar Muncindu waqala ukubanjwa imvukuzane eleminyaka eyisithupha ezelwe lapho odokotela abahle bacebisa ukuthi kasoze akhule njengabanye abantwana.

Kwakumele athole usizo esibhedlela kodwa ngenxa yokuswelakala kwemali, kwabanzima ukuthi abazali bakhe bamhambise kwabezempilakahle.

Usizo lokuthola imithi yokwehlisa ukubhibhidla kwemvukuzane lutholakala esibhedlela seMpilo koBulawayo.

Ngaleso isikhathi isibhedlela seBinga sasingeke simncedise ngalutho uFamiliar.

Iphephandaba likazulu likhulume lomama kaFamiliar uNkosazana Bongani Muchima othe imvukuzane ehlasele umntanakhe yaqala iliqhubu, yasiqansa ihlasela unyawo.

Uthe okwamanje badinga usizo lokuthi indodakazi yakhe ithole ukubonwa ngodokotela baphezulu koBulawayo.

Kubikwa uFamiliar udinga usizo lwemali ephezulu kweUS$500 ukuze aqale isigaba sakuqala sokwelatshwa.

UMthunywa uthintane leNduna uSinansengwe obike ukuba bayazi ngesimo somntwana njalo bayaphathisa ngalokho abakutholayo.

Kusenjalo, inhlanganiso ye-Cancer Association of Zimbabwe ibika ukuba abantwana abalitshumi babanjwa imvukuzane insukuzonke izwe lonke.

Umkhuhlane wemvukuzane uvamile ebantwaneni kodwa ubonakala ngemva kwesikhathi eside ngenxa yokuthi abazali abalalwazi ngokumemetheka kwawo.

Umqondisi wenhlanganiso ye-KidzCan, ephathisa abantwana abaphila lomkhuhlane wemvukuzane uthe kumele kwenziwe konke ukuthi uFamiliar athole usizo.

Labo abangafuna ukuncedisa uFamiliar, bakhululekile ukuthi bathintane lonina mamakhe kunombolo lezi: 0782857484