admin
Ethel Ncube
KULENINA elisinde ekufeni ezindlini zeGarikai eDete ngemva kokuhlahlelwa ngumnewabo ngehloka ekhanda lasala linamathele kubangwa ukudla.
Umetheswacala uKudakwashe Gumbo oleminyaka engu-29 kubikwa ngempelaviki wafica udadewabo uAlice Dube oleminyaka engu-46 esidla ilambazi wafika wamhlahlela ngehloka engakhulumanga lutho watshiya ihloka lilokhe lisekhanda wabaleka.
Kubikwa ngokwesaba wacina ehamba yedwa emapholiseni wafika wathi usebulele umuntu.
Amapholisa agijimela kuleyondawo afika aphathisa uNkszn Dube ukuthi aye esibhedlela.
Kuvele ukuba umetheswacala wabikela amapholiseni ukuthi okwenze wagamula udadewabo yikuthi bayamncitsha impahla ezithunyezwa ngunina zivela eGoli ngoba yena uyabe efuna bamnike ingxenye yakhe.
Umetheswacala kubikwa usezandleni zamapholisa okwakhathesi kukanti uNkszn Dube ulaliswe esibhedlela seHwange
Isikhulumi samapholisa eMatabeleland North uGlory Banda uthe bachwayisisa ngodaba lwendoda ehlahlele udadewabo ngehloka ekhanda kubangwa ukudla.
“Samukele udaba lwendoda ehlahlele udadewabo kubangwa ukudla. Ngithanda ukukhuthaza uzulu ukuba ukulwa kulicala nxa abantu besehlulana ngemibono abadinge omunye abancedise ukuxazulula udaba lwabo,” kuchaza uInsp Banda.
Online Reporter