Online Reporter
Nkosilathi Sibanda
UMQEQETSHI omkhulu weChicken Inn u-Joey Antipas usencome umdlali wakhe omutsha uLynoth Chikuhwa, ebika ukuthi wenze kuhle kumdlalo wabo leFC Platinum, lapho abanqotshwe 1-0 ngempelaviki.
Uthe uChikuhwa, odume ngelithi “Sonjy” emdlalweni, ubeyinsika yokuqina kwabagadli phambili kwenkundla.
“Ngibone ukuthi uSonjy udlale kuhle sibili. Ubeyibambile indima yabagadli ngesikhathi sihlasela.
Ungumdlali okhaliphileyo, owenelisa ukulandela ibhola, asekele abanye bakhe eqenjini. Uthole amathuba amanengi ngesigaba sokuqala somdlalo, kodwa unozinti ubekhangele. Kukhona lapho athole ithuba lokuhlohla kodwa kwehlule ukuthi aqine enyaweni, engikholelwa ukuba kudalwe yikuthi kade wacina ukudlala njengoba ubegcinwe ebhentshini ekuScottland,” kutsho u-Antipas.
UChikuhwa ungene kumaGamecocks ebolekwe kuScottland lapho asuke ehlohle ibhola elilodwa. Ngomnyaka odluleyo wahlohla amabhola angu-17 edlalela iHighlanders.
Andubana eqele “esilugwini” seChicken Inn, uChikuhwa bekucatshangelwa ukuthi uzaphenduka kuBosso.
Ukuze iqinise umkhankaso wayo kuCastle Lager Premiership, iChicken Inn iphinde yaqhatsha uPhilani Mabhena ukuba ngumsekeli kamqeqetshi.
Kulandela ukunqotshwa yiFC Platinum, abafana beChicken Inn bakunombolo yesi-13 kungalane yamaqembu. Liphethe imiklomelo engu-20, linqobe kumidlalo emine, lehlulwa kweyisikhombisa, lidlale ngokulingana kweyisitshiya galombili.
NgoMgqibelo liphenduka ekhaya lalo enkundleni yeLuveve lapho elizadlala leZPC Kariba.
