Udlovwe kathathu kuthiwa uvikelwa kusatanism

NguEmmanuel Ndlovu
“QAPHELANI abaphurofethi bamanga abaza kini bezembathise isikhumba semvu kodwa ngaphakathi bezimpisi eziphingayo!”
Lamazwi asebhukwini elingcwele agcwaliseke komunye umfundisi webandla lakoBulawayo owakhulelwa yimizwa yezocansi qede wadlova umzalwane esithi umvikela ukuthi angabi li-satanist.

Kuzwakale ukuthi uGreatness Tapfuma, 33, ongumfundisi webandla le-Kingdom Rulers International Ministries wabizela ngudlu omunye untanga oleminyaka engu-16 endlini yakhe esithi ufuna “ukumthandazela.”

Inkundla izwe ukuthi ngelanga elingaziwayo kunyanga kaMfumfu ngomnyaka ophelileyo, umsolwa wabizela umamangala endlini yakhe eselokitshini leCowdray Park.

Kubikwa umsolwa watshela umamangala ukuthi kulomoya omubi ohlupha imuli yakhe njalo lumoya wawuzabulala uyise.

Kuzwakale njalo ukuthi wabuya wamtshela ukuthi lamadimoni ayefuna ukusebenzisa umamangala amguqule amenze i-satanist.

Ngalokhu ukuze avikeleke kubikwa umsolwa wathi kungcono bathandane.

Kubikwa ngemva kwalokhu, umsolwa waya emacansini lomamangala kathathu.

Inkundla izwe njalo ukuthi umsolwa waphinda wadlova umamangala ngenyanga kaLwezi kanye lakuZibandlela kuwonalo umnyaka.

Kulandela lokhu, umamangala kubikwa watshela unina owahle waphanga wabikela amapholisa ngesiga lesi.

Umsolwa ubemiswe emthethwandaba we-Western Commonage phambi kukamantshi uWillard Maphios Moyo esetheswa icala lokudlova umamangala.

Umantshi kasathandanga ukuzwa isikhalazo sikamamangala esokucela uxolo ngalokhu udlulisele phambili ukuthethwa kwecala leli kumhlaka 2 Mbimbitho.

Umsolwa ubhadale ibheyili yemali engange$300.

Umtshutshisi bekunguMufaro Mageza.