Online Reporter
Brandon Moyo
UMNCINTISWANO womdlalo we-golf, owe-2025 Sterling International Pairs uzadlalwa kusukela mhlaka 14 kusiya ku 27 Mpandula.
Lokhu kukhulunywe ngumqondisi womncintiswano uShameon Mazvarira. Imidlalo le izaqhutshelwa eMulota Golf Club eMhondoro-Ngezi.
“Amalanga okudlalwa kwemidlalo yokucina ayedluliselwe phambili ku 27 Mpandula.
“Sikhangelele ukuthi kube lemidlalo emihle, siqhube kakuhle. Konke kuhamba ngendlela esiyikhangeleleyo. Amaqembu asenze kuhle kumalungiselelo ayo,” kutsho uMazvarira.
Ihlandla lalonyaka liqhutshwa ngaphansi kwendikimba ethi: Tee off for travel, discover the beauty of Zimbabwe. Umncintiswano lo ubalelwa kwemikhulu elizweni nanko udibanisa intshantshu ezivela endaweni ezitshiyeneyo.
Ugatsha lweZimbabwe Tourism Authority (ZTA) lungelinye lengatsha ezizaphathisa ekuqhutshweni kwemidlalo le, kusekelwa uhlelo lukaHulumende lokuthuthukisa ukuvakatshela indawo zakuleli.
Okwakhathesi, sekwaphela ama-qualifiers angu-26 ilizwe lonke, kubadlali abangu-1 280 abaphuma kumaqembu atshiyeneyo.
Kulabo asebengenile, kuloTinashe Tom loVumindaba Moyo abeNorton Golf Club, abangene ngemiklomelo engu-47, besedlula uTobias Kaitano loKundai Mahembe abakade bele-41.
UTom uthe:
“Ukunqoba kwethu kusijabulisile. Sikhangelele ukumela iNorton kumidlalo yokucina, silethemba lokuthi siphenduke kuWorld Final.”
Enkundleni yeBulawayo Country Club, umdlalo ubutshisa.
UKenny Moyo loThabani Ndlovu benelisa ngemiklomelo engu-45. Banqobe uClarence Sibanda loMark Ndlovu.
Owaye ngumongameli weZimbabwe Golf Association (ZGA) uMartin Chikwana laye udlalile.
Enkundleni yeBulawayo Golf Club uKudzi Chombo loKudzai Kamhuka badlale kakuhle, bathola imiklomelo engu-49.
Balandelwe nguChris Bannister loChippy Chapener abakade belemiklomelo engu-46.
Abazanqoba kumidlalo yokucina le balethuba lokuya mela ilizwe kuWorld Final, eGary Player Golf Course eSun City, eSouth Africa ngoMfumfu.
