admin
Thokozile Mbedzi
KUDABA olutshiye izakhamizi zididekile, kulomfundi okuFomu 4 wesigabeni esingaphansi kwenduna uChireya eGokwe ofe kulandela ukubamba omunye umfundi okuFomu 1 ibele.
UMthunywa uzwe ukuthi abafundi laba bathi bevela esikolo ngeviki ephelileyo lo osengumuyi uCostom Chungwa wasebamba omunye umfundi oyintombazana ibele okwabangela ukuthi lowomfundi ahambe ngakibo ekhala esiyatshela unina.
Induna uChiya Chireya ibikele uMthunywa ukuthi umfundi okuFomu 1 esetshele unina, wasuka lonina omdala baya ngakibo komfana ntambama bafika bamethusela bathi balakho ukumbophisa ayopika iminyaka engu-40 ejele kukanti nxa engafuni lokhu kumele abhadale iUS$3 000.
“Unina wentombazana wathatha udadewabo lomntwana baya ngakibo kukajaha bafika balethusela bathi kumele libhadale iUS$3 000 kumbe liyepika ejele iminyaka engu-40.
“Umfana lo kukhanya esesele yedwa wazidla amathambo engqondo wabona ukuthi ngeke aphunyuke kungakho wasebona kungcono ukuthi azibophele ngoba engelayo imali yokubhadala abangakibo kantombi,”. kutsho induna uChireya.
Kubikwa ngelanga elilandelayo abakoChungwa babona umntwana esezihilele basebesiyabika udaba lolu enduneni.
“Indaba le sithe siyithonisa enkundleni sananzelela ukuthi unina wentombi ulecala kungakho samgweba ukuthi ahlawule imuli yakojaha inkomo ezimbili kunye lenye eyenkundla.
“Okwenze samjezisa ngale indlela yikuthi le yimfundiso embi esigabeni kungakho besifisa lokhu kube yisifundo kwabanye omama ukuthi ukuthetha kunye lokwethusela abantu okucina kubangela ukulahleka kwempilo akufanelanga.
“Umthetho ubekelwe ukuthi uqondise umuntu owonileyo hatshi ukuthi ubulale, eqinisweni aluba lindaba yahamba emthethwandaba ujaha lo ubengeke agwetshwe iminyaka engu-40 kungakho sithi okwenziwe ngumama lo kubi ngoba umfana ucine esifa,” kutsho induna uChireya.
Online Reporter