admin
Thokozile Mbedzi
ZILOKHU zinkemile izakhamizi zelokitshini leMpopoma koBulawayo kulandela ukuzwa ngenye indoda ebulele enye izondele ukuthi yale ukumnika igwayi ukuze isuse umhawu.
Kubikwa uManuel Masocha oleminyaka engu-57 waphuma endlini yakhe esiya lapho okuthengiswa khona ehamba lomntanakhe oleminyaka yokuzalwa eyisificamunwe munye.
Kuvele ukuthi wathi esephenduka wayezibhemela umhlanga wakhe wahlangana lenye indoda angayaziyo eyacela ukuthi ambhemise wala bahle baxabana.
Ekhuluma lentatheli kaMthunywa uMnumzana Shine Ndlovu uthe babone into yamehlo.
“UMasocha usuke endlini lomntanakhe esiya lapho okuthengiswa khona wafika wathenga esebuyela endlini wahlangana lenye indoda ethutshe ngomgwaqo yahlangana laye egedini lapho efike yathi icela ukukhipha umhawu wegwayi yena wala.
“Khonokho nje kuhle kwadala inkalakatha yengxabano phakathi kwabo ngoba leyondoda ihle yacaphuka yaqala ukulwa loMasocha yasikhipha isikhali esicijileyo esingaziwayo yamhlaba ngaphansi kwesandla sokudla lesisu andubana icele ezinyaweni,” kulandisa uMnu Ndlovu.
Kubikwa uMasocha wathwalelwa esibhedlela lapho aqeda insuku ezimbili eselatshwa kodwa kwamqinela wedlula emhlabeni mhlaka 12 Mpalakazi.
Isikhulumi samapholisa koBulawayo ulnspector Abednico Ncube ebuzwa ngodaba lolu uvumile wathi solufikile ehofisini yabo.
“Udaba lwendoda elimaze enye solufikile ehofisini yethu ngakho sicela uzulu ongabe elolwazi lokuba indoda le ifinyelelwe ngumthetho azise amapholisa aseduzane laye,” kuphetha uInsp Ncube.
Online Reporter