admin
Ethel Ncube
SEKUVALWE ikilinika yeShale eMzingwane kulandela ukufulathela kwabomongikazi bekhonona ngokuhlukuluzwa “yizinto” abangaziboniyo.
Loba uMqondisi wezeMpilakahle esabelweni seMatabeleland South uDokotela Chipo Chikodzore engazange achaze kabanzi, uvumile ukuthi ikilinika yeShale ivaliwe.
Abafakazi abaqotho baveze ukuba ikilinika le ihlaselwe ngotikolotshi asebezenzela umathanda nanko phela kubikwa bahlukuluza omongikazi besifazane emacansini.
Indaba le isilesikhathi isenzakala yikho nje sebeze bathwala imitshaqana yabo babaleka ekilinika.
Ekhuluma loMthunywa omunye wezakhamuzi zakulindawo uMumzana Busani Sibanda uveze ukuba ondofa lokhe besalela ekilinika.
“Ikilinika le iselezinyanga ivaliwe ngenxa yabondofa abahlukumeza omongikazi. Omongikazi bavuka bephandle benqunu njalo kukhangeleka sengathi bebesemacansini kuthi obaba amaphambili avuka engathi avuvukile.
Sekuzanyiwe imizamo kodwa akukalungi kuhle.
Iphephandaba likazulu lixhumane loDkt uChikodzore oveze ukuba ikilinika lokhe ivaliwe.
“Sawuthola umbiko ovela kuzisebenzi zale ikilinika zikhala ngokuba ondofa bayabahlupha ebusuku.
Sazama ukukhulumisana lenkokheli zesigaba ukuze kulungisiswe udaba lolu kodwa kwehlula kungakho ikilinika lokhu ivaliwe izakhamizi sezisebenzisa enye engaba ngamakhilomitha angu-15 kusuka kuleyo evaliweyo,” kuphetha uDkt uChikodzore.
Online Reporter