Online Reporter
YiNtatheli kaMthunywa
IZAKHAMIZI ezihlala kumgwaqo obizwa ngokuthi Thirty Three Crescent eGlenview 1 esigodlweni seHarare zisele zitshe amathe kulandela ukubona ufudu ogqizisiweyo, wathandelwa ngamalembu amnyama njalo egqoke iwivu (weave) ekhanda etuckshop ngoLwesibili olwedluleyo.
UNkosikazi Molline Murambiza (42) ohlala kulindawo njalo ele-tuckshop lapho, uthe baqala ukubona ufudu lo ekuseni ngoLwesibili lweviki edluleyo ehamba ethandelwe ngamalembu njalo egqizile.
“Ufudu lo waqala ukubonakala ekuseni kungoLwesibili watshona ezulazula kulindawo abantu bekhangela nje bamtshiye ngoba besesaba ukusondela. Lamuhla ngoLwesithathu kuvuke kukhona njalo kuzihambela phambi kwama-tuckshop ethu aku-Thirty Three Crescent waze wayangena kwenye ituckshop engalamuntu oyisebenzisayo,” utsho njalo uNkkz Murambiza.
Ufudu lo ubangele ukuthi abantu babuthane okwensuku ezimbili.
UNkkz Murambiza uthe ucabangela ukuthi ufudu lo angabe esetshenziswa ngabathakathi kumbe nje abantu abafuna ukwethuselana ngaye kundaba abaphambanisana kizo.
“Lokhu kungabe kuyimisebenzi yabathakathi ngoba akula fudu weganga ongagqiziswa lokuthandelwa ngamalembu kanje.
Mhlawumbe njalo kulabantu abafuna ukwethuselana nje. Yindaba embi kakhulu ukuthi abantu basebenzise inyamazana kaNkulunkulu ngalindlela,” utsho njalo.
Umnikazi we-tuckshop lapho okwangena khona ufudu okhethe ukuzibiza ngokuthi Chihera kuphela nje uthe akala mazwi amanengi ngaloludaba njengoba laye ezwe esebizwa abantu besithi sokungene ufudu e-tuckshop yakhe.
“Angilawo amanengi njalo angazi lutho ngofudu lo. Okukhulunywa ngaye ngoba i-tuckshop yami ngayivala kudala.
Ngizwe sengibizwa kuthiwa sokungene ufudu endaweni yami. Akulalutho ku-tuckshop leyana, ngayivala kudala,” nguChihera lo. UNkosikazi Ottillia Mazhindu (39) ohlala kulindawo uthe waqala ukubona ufudu lo ngoLwesibili olwedluleyo.
“Kuyisimanga endaweni yethu le ukubona into enje, asazi ukuthi ngufudu wabathakathi yini njengoba ubethandelwe ngamalembu wagqiziswa, ngempela abathakathi banzima,” kutsho uNkkz Mazhindu.
UNkosikazi Calex Kamombe (39) uthe indawo yabo isisesabisa ukuhlala kiyo.
“Asazi ukuthi owajikela ufudu wakhe lapha ngubani lokuthi sizatho bani esimbangele ukuthi enze kanje. Sesihlala sisesabela impilo zethu lezabantwana,” utsho njalo.
UMnumzana Tafirenyika Maronje (46) osebenza ukuthengisa impahla etshiyeneyo kulindawo ufice intatheli ikhona wasevula umnyango we-tuckshop wathola ufudu ecatshile phakathi kwamakhadibhokisi wamkhipha phakathi esebenzisa ugodo okwenze abantu babaleka ngenxa yokwesaba.
Enye njalo indoda efike lapho idakiwe ebizwa ngokuthi nguThanks nje kuphela ufike waqala ukukhombela intatheli ethi zidingani lapho njalo zingena njani kudaba lukafudu qede wadobha ufudu wamjikela phezulu andubana amkhahlele kanenginengi okwenze abantu babaleka.
“Lingithathelani amapikitsha? Sukani lapha ngizalibophisa, tshiyani ufudu lo, wenzeni,” utsho njalo.
Usuke lapho wathatha ufudu wahamba laye eqonde emavinkilini eGlenview 1 Shopping Centre.
Kusenjalo omkhulu kunhlanganiso yeZinatha, uGeorge Kandiyero, uthe abantu akumelanga bahlukuluze inyamazana zeganga njengalokhu okwenzakala kufudu lo.
“Inyamazana zeganga zidinga ukuphathwa kuhle kungela ozihlukuluzayo. Abantu abenza lokhu kumele bamangalelwe emapholiseni babotshwe,” kutsho uKandiyero.
UMnumzana Tinashe Farawo oyisikhulumi seZimbabwe National Parks and Wildlife Management Authority (ZimParks) uthe kulicala ukutholakala uhlukumeza inyamazana zeganga.
Ukhuthaze uzulu ukuthi angabona abantu abahlukumeza inyamazana zeganga bamangalele emapholiseni.
