admin
Ethel Ncube
KULENDODA yeNtalale eGwanda esele ithoba amanxeba ngemva kokugwazwa ngomkhonto kucatshangelwa ukuba itshontshe umakhalekhukhwini.
Indaba le yenzakale emavikini amabili adluleyo lapho uBenson Dube agwaze uMnumzana Tedius Nare kubangwa umakhalekhukhwini owacatsha ngesikhathi besetshwaleni.
Esinye isakhamuzi esasikhona kuvuka umsindo uMnumzana Velani Sibanda uveze ukuba omunye lo walimalela amahala.
“Kukhanya umnikazi kamakhalekhukhwini wathi esiyathelelwa utshwala watshiya ucingo lwakhe phansi waselibala ukuludobha kungakho wathi eseludinga waluswela wahle wacabangela ukuba ngomunye walabo ababehlezi bonke olutshontshileyo.
“UDube waqonda uNare wathi nguye oyithetheyo bahle badonselana phandle ngokucwayiza kwelihlo wadobha umkhonto owawuseduzane wamgwaza kanti wenza iphutha, ucingo lwaluthethwe ngomunye.
“Uthe esemgwaze kanye kwafika omunye wajwamula umkhonto wabuza ukuthi babangani, yikho lapho okwavela khona ukuthi ukhona owayemdobhile umakhalekhukhwini lowo,” kubika uMnu Sibanda.
Intatheli iphinde yaxhumana lomunye owayekhona uNkosazana Lungisani Ndlovu onguye owadobha ucingo waveza ukuba uNare walimalela amahala.
“Mina ngangiphandle ngithelela abathengayo utshwala ubaba lo wabuya locingo lwakhe wafika walubeka phezu kwenkonxa wasuka wayanatha mina ngaludobha ngalubeka endlini ngoba ngingamazi umnikazi walo.
“Ngamangala sengisizwa kuthiwa omunye segwaziwe ngomkhonto kuthiwa utshontshe umakhalekhukhwini,” kutsho uNkszn Ndlovu.
Intatheli ikhulumisane loTedius Nare onguye owagwazwa ngomkhonto yena oveze ukudana.
“Okuzwileyo liqiniso mina ngivele angithandi ukulwa, ngamangala ubaba lo esengidonsela phandle esithi ngitshontshile wafika wangigwaza ngomkhonto engalweni wathi eqeda lapho ucingo lwakhe walubona. Mina ngangivele ngingelacala,” kuchaza uNare.
Iphephandaba likazulu likhulumisane loMnu Dube onguye owagwaza omunye owale ukukhulumisana lentatheli ngodaba lolu.
“Angilaso isikhathi sokukhuluma labamaphephandaba mina,” etsho equma ucingo uMnu Dube.
Online Reporter