admin
Intatheli KaMthunywa
UKUFIKA kukaHendrik Pieter de Jongh kwenze inyawo zabadlali beHighlanders zaluma nanko benelise ukuligaxa entanjeni kumidlalo emibili, ngemva kwesikhathi besehluleka.
Lumqeqetshi usephiwe lebizo elitsha elithi “Hlabangana”.
Umqeqetshi omutsha lo uqale ukuba leqembu ngoLwesithathu lweviki edluleyo iBosso inqoba iBulawayo Chiefs ngamabhola amathathu kwelilodwa. Lokhu bekuyisiqalo kubafana beTshilamoya ukuthi bahlohle ibhola eledlula elilodwa emdlalweni. Besekuyinjwayelo ukuthi iqembu lakoBulawayo leli liphume enkundleni linqotshiwe kumbe liphethe umklomelo owodwa.
Labagadli ababalisa uPrince “Mgadafi” Dube bafunde ukukhabela ibhola emanethini ngoba bebona ukuza kukaHlabangana kwezinkulu.
UPrince uhlohle ibhola elilodwa elikhiphe isitha esidala iDynamos kunkezo yeChibuku ngeSonto.
Ebuzwa ngokukhetha kwakhe ukuqeqetsha iBosso u-de Jongh uthe kusukela ngo-2015 wayefuna ukuza koBulawayo.
“Ngithanda ukuthi iHighlanders liqembu eliqoqekileyo. Inhlelo zayo zihlelekile njalo bengiyilandela kusukela kudala, ngibona ukuthi iBosso liqembu engingenelisa ukuthi ngilincedise.”
Ukaputeni weqembu uAriel “Mangoye” Sibanda oxoxe loMthunywa kuliviki uthe akula lutho olutshintshileyo eqenjini kodwa sebethole intshukuntshu entsha.
USibanda uthe: “Iqembu lilabadlali abeneleyo kuthi banqobe loba yiwuphi umdlalo. Besingakahlangani kuhle njalo kweminye imidlalo bekungumnyama nje ukudliwa ngoba ibhola siyaligiqa kwale ukuhlohla,” kutsho uSibanda unozinti omkhulu weqembu.
Umqeqetshi weBosso uphiwe isivumelwano sokusebenza esenyanga ezine nje. Leliqembu lisinde kancane ukuthi libalelwe kulezo ezizaxotshwa. Andubana iBosso idibane leChicken Inn kumdlalo waphakathi kweviki, iphethe imiklomelo engu-28 kuphela, iyehlukane kancane laleyo ehuba phansi iYadah.
Kusiyafika impelaviki kubangwa umdlalo wesi-24 kuligi yeCastle Lager, kuzabe kungumncintiswano ozwayo kumathimu amane aphezulu.
IChicken Inn, FC Platinum Caps United leZPC Kariba yizo eseziphumele phambili njalo zibika ukuba zingayithwala inkezo.
Online Reporter