Online Reporter
YiNthatheli kaMthunywa
INDODA ethe uninazala ngumthakathi yaze yathi wapha umkayo imithi yokusebenzisa ukwenza imithanithani yobumnyama ihlawuliswe yinkundla yomphakathi yenduna uMakoni.
UEdward Machokoto, kanye lomfowabo, uTimothy, babizwe enkundleni yomthetho wesintu ngumamazala wakhe, uVenenzia Ndoda, oyinyanga evela eRukweza, ebamangalela ngokumthuka ngokuthi ungumthakathi.
UNdoda utshele inkundla ukuthi yena lendodakazi yakhe, uHazvinei — umka Edward — betheswa umlandu wokuloya esinye isihlobo saboMachokoto ngemva kokuba sesizacile.
Isihlobo lesi kwacina kutholakale ukuthi silesifo setshukela esibhedlela.
“Ngenyanga edluleyo, ngichithe amasonto amabili ngisentabeni ngiyencedisa ukukhulekela izulu, lapho engangipheka khona utshwala besintu. Ngathi ngibuya ekhaya, indodakazi yami uHazvinei yeza kimi ikhala ebusuku.
Yathi umdeni wakoMachokoto ubize umphurofethi othe ngimnike izinto zokuloya, okugoqela itshefu, ilembu elimnyama, ukuthi enze imisebenzi yobuthakathi emdenini wabo,” kutsho uNdoda.
Ngokutsho komphurofethi lo, omunye umalukazana wakoMachokoto waphuma isisu ngoba eke wathandela ilembu elimnyama leli.
Umphurofethi wathi uHazvinei nguye owayebangela ukugula komfana omncane emdenini khonapha owayephelelwa ngamandla.
UNdoda uthe ubike ukuba wahamba wayabika indaba le kumgcinisihlalo wesiqinti owambikela ukuthi laye wayekhona mhla kuthiwa uyathakatha.
“UTimothy labanye abangakibo bathi besizwa ukuthi ngizwile ngabakade bengethesa khona bagijima bazocela uxolo kimi,” kutsho uNdoda.
Uthe umuzi wendodakazi yakhe awusamanga kuhle ngenxa yomsebenzi wakhe wokuba ngusiyazi, ngesikhathi umdeni wakoMachokoto wona uyingxenye yesonto labagqoka izigqoko ezimhlophe.
“AbakoMachokoto bahlezi bephatha uHazvinei kubi, bemsola ngokuthi ngumthakathi. Ukuhlukunyezwa lokhu kuvela kubafowabo bendoda yakhe kanye labomkabo,” utsho kanje ebikela inkundla.
Inkundla yenduna uMakoni ithe uEdward loTimothy balecala, yabahlawulisa ngokukhuluma amanga ukuthi uNdoda ngumthakathi lokwehlisa isithunzi sakhe.
Ngemva kokuzwa ubufakazi obuvela kunxa zombili induna uMakoni uthe abakoMachokoto balecala yathi bahlawule ngenkomo eyodwa lokukhokhela indleko zakhe zokumangalela ezifika kuUS$100.
