Online Reporter
YiNtatheli kaMthunywa
INDODA eleminyaka engu-50 yokuzalwa, ehlala esigabeni seParowa ngaphansi kwenduna uMarange, eMutare, itholakale ifile ngeviki edluleyo kusehlakalo okusolwa ukuthi yazibulala ngemva kokuphikisana lendodana yayo, eyayiyisola ngokuthi yayilala lendodakazi yayo eleminyaka engu-20.
UBenny Chimhuya, obesaziwa kakhulu ngebizo lokuthi Beniza, utholakale elenga esihlahleni ngemva kokuzilengisa. Isihlahla lesi besiseduze komfula obizwa ngokuthi nguMusatya.
Icala lakhe belisaqhubeka phambi kwenkundla yenduna, lapho ayesolwa khona ngokulala lendodakazi yakhe.
Izinsolo lezi zitshiye imuli ilemibuzo eminengi engakatholakali izimpendulo.
Udadewabo kamuyi, uNkosikazi Dorcas Chimhuya-Mangwandi, uqinisekise ukuthi uBenny wayesolwa ngokuya emacansini lendodakazi yakhe.
Uthe uBenny wayelabantwana abalitshumi.
“Wayelabantwana abalitshumi, abahlanu bengamantombazana, njalo kuthiwa wayesethandana lamanye amadodakazi akhe. Wayesethuthele eBezeley Bridge elomunye wamadodakazi la, emthatha njengomkakhe,” kutsho uNkkz Chimhuya-Mangwandi.
Uthe udaba lolu lwavela sobala ngemva kokuba uBenny lendodana yakhe uWish bephikisane ebusuku, ngaphambi kokuba uBenny ayozilengisa.
“Umnewethu wazilengisa ngemva kokuphikisana lendodana yakhe. Baqala ngokulwa ngoba uWish wayefuna ukwazi ukuthi kungani uyise ehlukumeza odadewabo ngokocansi kangaka,” kutsho uNkkz Chimhuya-Mangwandi.
Uthe uWish wabotshwa esolwa ngokutshaya uyise, owathathwa wasiwa eVictoria Chitepo Provincial Hospital ukuyakwelatshwa.
“UWish wabotshwa kwathi umnewethu wagijinyiselwa esibhedlela. Ukukhululwa kwakhe esibhedlela ngosuku olulandelayo kwahambisana lokukhululwa kukaWish emapholiseni.
Ngalobobusuku umnewethu wazibulala,” kutsho yena.
UNkkz Chimhuya-Mangwandi uqhubeke wathi umnewabo wayelenotho enengi kakhulu lanxa wayengasebenzi umsebenzi owawubonakala, okuyikho okwabangela ukuthi abanye abantu basole ukuthi izinsolo zokulala lamadodakazi akhe ngokocansi zazihambelana lemikhuba yokuthakatha angabe wayeyenza ukuze andise inotho yakhe. Uthe enye yamadodakazi la yakhulelwa ngesikhathi ihlala loyise, kodwa umntwana owazalwa kulokho okusolwa ukuthi kwakuyisihlobo esingavunyelwa ngokwesiko. langokomthetho, wafa esanda kuzalwa.
Uthe ngemva kokufa komntwana lo, udaba lwabikwa enkundleni yenduna uMarange, lapho uBenny abizelwa khona ukuthi azophendula izinsolo zokulala ngokocansi lendodakazi yakhe.
Kuthiwa umuyi waziphika izinsolo lezi.
“Waziphika esithi abantu babemhawukela ngenxa yothando ayelalo ngendodakazi yakhe. Wathi wayeyifundisa ukutshayela imota, njalo ngenxa yokuthi kwakungekho umfakazi owayebabone belele embhedeni ndawonye, udaba lwaphela. Ngemva kwalokho waqala ukungisola esithi yimi engahambisa udaba enkosini, kodwa mina ngangikade ngingakwazi lutho ngalo,” kutsho uNkkz Chimhuya-Mangwandi.
Uthe izinsolo lezi kaziphelelanga lapho.
Omunye wamadodakazi kamuyi, oselekhaya lakhe, kuthiwa wake wakhala emulini esithi uyise wayemhlukumeza, kodwa izihlobo zathi zehluleka ukungenelela ngenxa yokungazwani okwasekukhona phakathi kwemuli.
“Indodakazi yakhe endala, esitshadile, yake yakhala isithi iyahlukunyezwa nguyise wayo, kodwa akukho esasingenelisa ukukwenza ngoba wayethathe incwadi yokusivikela — thina odadewabo.
Kwasekukubi phakathi kwethu, njalo lamadodakazi okuthiwa ayahlukunyezwa kawakhulumi lami,” utsho njalo.
Omunye umhlali wakuleyondawo, ongafunanga ukubizwa ngebizo, uthe ukungazwani phakathi kukaBenny loWish kwakusaziwa emphakathini.
“UWish loyise babehlala bephikisana. Babeze lapha eGomorefu Business Centre bephikisana ngendaba yezihlobo ezingavunyelwayo, kodwa akekho owakhuluma ngezinsolo zokuthi umuyi wayelala lamadodakazi akhe ngoba udaba olunjalo lwaluzadinga ubufakazi obuqinileyo,” kutsho umhlali lo.
INkosi uMarange iqinisekise ukuthi udaba lolu beluphambi kwayo.
“Udaba lolu lusekhona enkundleni yami, njalo kuyadabukisa ukuthi wazibulala. Sisasaqhuba uphenyo lwethu, kodwa aluba besimthola elecala, besizahlawulisa indodakazi yakhe inkomo ezimbili, loyise laye inkomo ezimbili, besesihambisa udaba emapholiseni ngoba ukulala kwezihlobo ngokocansi kuyicala.
“Lanxa kunjalo, ukuzibulala yinto esingayithathi lula endaweni le, njalo imuli yabo izahlawuliswa,” kutsho induna uMarange.
Amapholisa abengakakhulumi ngokufa kukaBenny ngesikhathi indaba le ilotshwa.
