Online Reporter
YiNtatheli kaMthunywa
UMPHATHINTAMBO wogatsha lwe-Local Government and Public Works uDokotela Daniel Garwe uthe uHulumende kasoze ekela idolobho lakoBulawayo ligcwala ingcekeza, nanko sekuzaqala inhlelo zokuhlanza zonke indawo ezingcolileyo edolobheni.
Phakathi kwalezi inhlelo, kuzaqakathekiswa ukulungisiswa kwegceke okulahlelwa khona ingcekeza eleNgozi Mine.
UDkt Garwe wethule lokhu ngoLwesine, ngesikhathi eqhuba umhlangano lekhansili yedolobho lezinye ingatsha eziphathelane lemisebenzi kazulu.
Ukhuthaze izakhamizi zedolobho, osomabhizimusi labanye abathintekayo ukuthi basebenze ndawonye ukubisela isithunzi sedolobho njengendawo ehlanzeke ukwedlula zonke elizweni.
UDkt Garwe uthe uHulumende kasoze abekezelele ukungcoliswa kwedolobho, ukuthengisela endaweni ezingavunyelwayo lokungalandelwa komthetho.
Umhlangano lo ulandele omunye owaqhutshwa eHarare mhlaka 2 kuMpandula.
“Silapha sizodingida ikusasa elihle yaleli idolobho,” kutsho uDkt Garwe.
Ugcizelele wathi inhloso yomhlangano ibingayisiyo eyokwethusela kumbe ukusongela abantu, kodwa ibigxile ekutholeni amacebo ngokuxoxisana ndawonye.
“UBulawayo lidolobho lesibili ngobukhulu elizweni. Yindawo yamankampani amakhulu, ezokuthengiselana, amasiko lobuciko. Lidolobho eliqakathekileyo kakhulu kumbali lekusasa yelizwe.”
Uthe ukuhlanzeka kwedolobho, izakhiwo zalo, amanzi, imigwaqo kanye lokuhleleka kwalo yikho okwakha isithunzi salo.
Ucele izakhamuzi ukuthi zizibuze ukuthi zifuna ukutshiyelani izizukulwane ezizayo.
“Silungiselela uBulawayo onjani kuzizukulwane esizayo?” kubuza uDkt Garwe.
“Akumelanga kube lengcekeza yonke indawo labantu abathengisa impahla phambi kwezitolo kasibafuni.
“Kumele siqale ngokulungisa ingqondo zethu. Akusikho ukuthi kungenziwa yikhansili iyodwa.
Ngumthwalo wethu ukuhlanza idolobho lethu.”
Ukhuthaze abathengisayo ukuthi basebenzele endaweni ezibekiweyo, ebika ukuba kabasi zitha zikaHulumende.
“Abathengisi kabasizitha zethu, kodwa okugcwala yonke indawo yikho esingakufuniyo,” kutsho uDkt Garwe.
Uphinde wakhuthaza amapholisa lekhansili ukuthi bangasebenzisi amandla ngokungadingekiyo, kodwa bafundise izakhamizi ngemithetho.
