Online Reporter
Nkosilathi Sibanda
USAZIWAYO kwezokulondolozwa kwamasiko lokuphakamisa imfundo emaphandleni, uDr Gasolo, usezaqala uhambo lwakhe lokusuka esikolo seMatshesheni Primary eGwanda North, eqonde koBulawayo.
Uhambo lolu, olungamakhilomitha alikhulu, luqala mhlaka 17 Mpandula, njengengxenye yokugubha iminyaka emihlanu yomsebenzi wakhe wokusekela lokukhulisa amathalenta abasakhulayo emaphandleni.
UDr Gasolo uhlose lokusebenzisa uhambo lolu ukuqoqa usekelo lokuthuthukisa impilo yabantwana basemaphandleni kwezemfundo. Uhlele ukuncedisa izikolo zemaphandleni eziyisithupha ekutholeni ama-Starlink Kits.
Ama-Starlink la azanika abafundi ithuba lokuthola i-internet, kuvuleke amathuba okuthi bafinyelele ulwazi lwezemfundo olutholakala kwamanye amazwe lokwazi amanye amacebo okuziphilisa lokuvula amabhizimusi.
“Abantwana kumele sibaphe amathuba lobaxhumanisa kumitshina yakulezinsuku besase sikolo,” kutsho uDr Gasolo ekhuluma lephephandaba likazulu.
“Kasila ndawo zomphakathi kumbe lapho okuhlangana khona abatsha eGwanda North, ngakho ukuba khona kwalezinsuku kuza kwenza abafundi, ababalisi lomphakathi wonke ubelenzuzo.”
