Online Reporter
Brandon Moyo
UTAPIWA Jele ube ngumdlali wakuqala wakoBulawayo ukunqoba umncintiswano weCBZ National Open Chess Championship ophele ngoMgqibelo eHarare.
UJele, oleminyaka engu-27 yokuzalwa, ubedinga umklomelo (count) owodwa ukuze anqobe uVitalis Mapuranga, athathe isicoco esikhulu ngemva kokuthi abadlali bobabili beqede belemiklomelo eyisikhombisa.
Omunye umdlali, uZhemba Jemusse, laye ubedinga umklomelo owodwa ukuze ehlule uRoy Mwadzura, ukuze aqede esendaweni yesithathu.
Ekhuluma ngesikhathi efika egcekeni lendizamtshina eleJoshua Mqabuko Nkomo International Airport, uJele – ophinde abe yintshantshu yakoBulawayo, uthe uzizwa ephakanyisiwe ngokuthola isicoco esikhulu elizweni.
Lo bekungumzamo wakhe wesithathu kulelibanga lomncintiswano.
“Lokhu kuyikuphumelela okukhulu kimi. Bonke abake baba zintshantshu kuBulawayo Championships behluleka ukunqoba kumaNational Championships. Ngomnyaka odluleyo ngaqeda endaweni yesikhombisa. Kusukela ngoMpandula nyakenye bengilungiselela lokhu. Ngiyaziqhenya. Ngibonga kakhulu kuZimbabwe Chess Federation labaxhasi bami.
“Ngithanda ukubonga njalo inhlanganiso yeBulawayo Chess Association ngokungisekela njalo kangizange ngikhangelele ukuthi ngizanqoba ngoba bonke abake bathwala isicoco lesi babekhona, ngakho ngangicabanga ukuthi omunye wabo uzanqoba,” kutsho uJele, ophinda abengumphathi we-Elite Players Chess Academy ekoBulawayo.
Umqondisi wenhlanganiso yeBulawayo Chess Association (BCA), uThamsanqa Moyo, uthe bayaziqhenya ngoJele ngokusebenza kwakhe gadalala.
“Ngimele inhlanganiso yeBCA kunye lomgcinisihlalo wethu uLiberty Moyo, ngithanda ukuhalalisela uTapiwa Jele ngomsebenzi wakhe omangalisayo kumncintiswano we. Siyaziqhenya ngaye ngoba isilotshiwe imbali ukuthi umdlali wakoBulawayo unqobe isicoco selizwe. Lokhu kukhuthaza abadlali abasakhulayo,” kutsho uMoyo.
UChristine Makwena uphumelele ukuvikela isicoco sakhe seCBZ National Open Chess esigabeni sabesifazane.
Umncintiswano lo ubulabadlali abedlula abangamatshumi amabili.
