admin
Cornelius Luphahla
LONYAKA uBulawayo uyadela nanko phela umculi walapha odume ngezimnandi ocula umculo odabuka eSouth Africa amarabi,uMajahawodwa Ndlovu odume ngelithi Jeys Marabini uzabe ephakululela abalandeli bakhe ukudla kwamehlo ngemva kweKhisimusi.
UJeys uzatshaya mhlaka 26 eBulawayo Theatre kusuka ngehola lesikhombisa kusiya kwelesifica munwe munye.
UJeys Marabini ubikele intatheli ukuthi umcimbi lo uzaqala ntambama njalo uzakuba ngamahola amabili kuphela.
“Umcimbi lo sizawuqala ngo-7 ntambama uyephela ngo-9 ntambama njalo kubalulekile ukuthi abantu babambe isikhathi ukuze bengakhutheki.
“Okwenza singaculi kuze kuse yikuthi asifuni ukuthi abantu baze badinwe ngomculo wethu sifuna ukuthi basale bejabule. Ngiyazi abanye bengasisola lesisikhathi bethi sincane kodwa kulo ozabe ekhona sizakuba sinengi ngoba uzajabula,” kutsho uMarabini.
UMarabini uqhubeke njalo waveza ukuthi okwenza atshaye kule indawo yikuthi ufuna ukujabulisa abantu ebonga labantu ukuba bayaphila njengoba umnyaka suphela.
“Okwenza sibe lomcimbi lo yikuthi sijabulele ukuthi uMdali usiphilisile kwaze kwafika ukuphela komnyaka ngakho sifuna ukujabula labantu. Sinanzelele ukuthi abantu ngalelolanga bayabe betshone bephumula njengoba bezabe bejabule kakhulu ngeKhisimusi ngakho ntambama kuyabe kufanele bazojabula lathi.
“Ngalelolanga sizabe sipheka enye i-DVD yethu ngakho abalesifiso sokuphuma kuyo kababuye ngobunengi ukuze baphume kuyo.
“Lalabo abangazake bambone uJeys abamzwela ekuculeni kababuye bezombona ngamehlo esenza adume ngakho,” kutsho uJeys.
UJeys uthe okwenza engahlali etshaya ingoma zakhe lapha yikuthi uyabe efuna ukuthi abantu bamlambele bengadinwa ngaye. Uthe okunye njalo yikuthi ujwayele ukutshaya kumicimbi eyabe ivalelwe (private shows) ngakho khathesi unanzelele ukuthi kumele azotshaya lapha koBulawayo ukuze akhuthaze uzulu ukuthi angalahli abaculi balapha abasekele ukuze bathuthuke.
Ubuye njalo waveza ukuba ukubuya kwakhe lapha ufuna ukubona sibili ukuthi abantu abahlala bembiza ku-Facebook, whatsapp bethi kazotshaya koBulawayo, bazabuya yini bezojabula laye.
Online Reporter