admin
“KUMINYAKA engu-99 ezayo, nxa inkosi isangigcinile umqeqetshi weJomo Cosmos kuyabe kuyimi lo, uJomo Sono,” utsho kanje ezitshaya isifuba umqeqetshi ophinda abengumgcinisihlalo weZenkosi u-Ephraim “Jomo” Sono.
Inkulumo le ibigcwele ukuzethemba kodwa kusobala ukuthi ilobumunyu njalo iveza ukuthi uJomo angeke wazitshiya intambo zokuqeqetsha iqembu lakhe.
ICosmos iphenduke iyoyo ku-Absa Premiership yanqotshwa yaze yabuyela kuNational First Division njalo.
Ezenkosi zaganyulwa lihloka okokuqala kuPremier Soccer League (PSL) eyasungulwa ngo-1996/97 ngesikhathi ziqeda ekugcineni ngo-2007/2008. Ngo-2008/2009 iCosmos idle ubhedu kuNational First Division (NFD).
Ngo-2009/2010, uMjomane uphinde watshaywa futhi kwathi ngo-2010/2011 wabuyela esigabeni esikhulu.
Ngo-2011/2012 uSono limphindile ihloka ngemuva kwalokho wahlala amasizini amabili kuNFD wabe esebuyela esigabeni esikhulu.
Exoxa labezindaba, uSono ulimise ngesihloko elokuthi akaziboni etshiya isikhundla sokukhuza iCosmos.
“Sifake isicelo sokwakha eyethu inkundla. Siyaxolisa kubalandeli ngendlela emangalisayo. Inkundla le sifuna ukudlalela kiyo iminyaka engu-99 ezayo futhi kuleyo minyaka yimi engizabe ngilolonga iqembu,” kutsho uSono.
ICosmos iqede isendaweni yokucina ku-logu ngemiklomelo engu-25 emidlalweni engu-30. EzikaMjomane zinqobe imidlalo eyisithupha zatshaywa engu-17 zase zidlala ngokulingana kweyisikhombisa.
“Kusale kancane ukuthi sizuze ebesizibekele khona kulisizini. IJomo Cosmos asilona iqembu elilwela i-Top 8 ngoba besizibekele ukuqeda endaweni yenombolo yesi-14. Kusale kancane ukuthi sikwenze lokho.
“Sitshaye amaqembu amakhulu kulisizini ngakho-ke sizophinde sibuye esigabeni esikhulu. Ngilesiqiniseko sokuthi sonke siyibonile iBlack Leopards ukuthi yenze kanjani kulisizini kodwa ngesizini ezayo uzoyibona. Uzowabona amaqembu azolwa kanjani njengoba sekubuye thina kuNFD,” kutsho uSono. —Ubulembu
Online Reporter