Online Reporter
Lovemore Dube
OWAYENGUMDLALI olodumo kunguqu uGibson Homela usecele ukuthi iqembu leZimbabwe Saints liphathiswe ukuze liphindele kuPremier Soccer League.
IZimbabwe Saints isileminyaka phose engamatshumi amabili idlala kuDivision One.
Okwakhathesi idlala kuZifa Southern Region ngemva kokuthenga indawo yeMakwika United. Iqembu leMakwika ngeleHwange njalo laswela imali yokuthi lidlale kulelibanga ngemva kokunqoba kuMatabeleland North Zifa Division Two A League.
UHomela wenze lesisicelo kumkhosi wokuzalwa kwakhe ngoMgqibelo odluleyo.
“Angifuni ukutsho okunengi, kukodwa nje engingakucela, ukuthi iqembu leZimbabwe Saints liphathiswe ngemali lidlale lize liyephezulu,” kutsho uHomela.
UHomela ubaliselwa kwabalutshwana abahlonitshwayo kubhola leZimbabwe njalo kuqembu alidlalelayo iZimbabwe Saints.
Ukhulume lokhu phambili kwabanye adlala labo abagoqela u-Amin Soma-Phiri, Douglas Mloyi, Tobias Mudyambanje, Cosmas Zulu, John Nyumbu labaqeqetshi babaqeqetshi uJoseph Sibindi loOscar Mazhambe.
Uthe uyilokho ayikho ngenxa yeZimbabwe Saints.
“IZimbabwe Saints yangenzela okukhulu njalo ngiyafisa ukuthi ngabe okwakudala kuyavuselelwa njalo iqembu lethu libe ngelinye lamaqembu aphezulu,” kutsho uHomela, owadlala phose iminyaka engu-19.
Udlalele iZimbabwe Saints ilizwe lingakatholi uzibuse langemva kukazibuse.
IZimbabwe Football Association ngo-1986 yamhambisa kweleGermany ukuthi ayefunda okunengi ngomdlalo lo.
Okwakhathesi ungumsekeli kamgcinisihlalo wama-trustees eZimbabwe Saints.
Esinye isicelo uHomela alaso ngesokuthi kwezemfundo ibhola libe ngokunye okufundwa emakolitshini lapho okuphekwa khona ababalisi.
