Online Reporter
Fairness Moyana
IZIKOLO zeMabale Primary leNabushome Primary eHwange, eMatabeleland North, zithethe izicoco zomqhudelwano webhola, oweSabona Trust-Krantz Soccer Tournament ngemva kokunqoba ngembekwa emidlalweni yokucina.
IMabale Primary ithwale isicoco sabafana ngemva kokwehlula iLupote Primary, kuthi iNabushome Primary ibe zintshantshu kumankazana ngemva kokunqoba iDopota Primary.
ILupote iqede isendaweni yesibili kweyabafana, iNabushome yathatha eyesithathu.
Kumantombazana, iDopota ibe ngeyesibili kwathi iLupote yathatha indawo yesithathu.
UPride Moyo weMabale Primary ube ngumdlali ohlohle amabhola amanengi, u-Awande Ncube oweNabushome uthole umvuzo ofanayo kumankazana.
Ekhuluma emkhosini wokwethulwa kwemiklomelo, uMhloli wezikolo eHwange, uLawrence Matshazi, uncome iSabona Trust ngokusebenzisa ezemidlalo ukukhuthaza imfundo lokuthuthukisa umphakathi.
“Ibhola lihlanganisa abantu, lifundisa intsha ukuziphatha, ukusebenza ndawonye, ukubekezela, ukuhloniphana lokuba ngabakhokheli abalungileyo. Lezi yizifundo eziqakathekileyo empilweni,” kutsho uMatshazi. Uncome njalo inhlanganiso le ngokusekela imizamo kaHulumende ngokubhadalela abafundi imali zesikolo, ukudla lokuncedisa imuli eziswelayo.
Umqondisi weSabona Trust, uHlanganiso Moyo, uthe inhlanganiso yasungulwa ngemva kokuba owesifazane waseNorway, uIngrid Solholm, evakatshele eDopota ngo-1999 wabona ubunzima obabubhekene labafundi.
“Sananzelela ukuthi ukunika abantwana ukudla kuphela akwenelanga. Kwakumele sisekele imfundo, sithuthukise impilo zemuli njalo sinike abantwana amathuba okuphumelela empilweni. Sesikwenza lokho,” kutsho uMoyo.
Uthe umqhudelwano webhola waqalwa ngenhloso yokuphathisa abantwana abalethalenta kwezemidlalo.
“Asigxili ezifundweni kuphela. Sifuna lokukhulisa ithalenta lezemidlalo ngoba wonke umntwana ulelungelo lokuthola ithuba lokuphumelela,” kutsho uMoyo.
ISabona Trust isebenza ezabelweni zeHwange leLupane, lapho esekela khona izikolo ezibalisa iDopota, Mabale, Nabushome, Lupote leSianyanga ngokubhadalela abafundi imali zesikolo, ukubapha ukudla lokuqhuba amaphurojekithi amanzi, ezempilakahle lokulima.
