admin
Cornelius Luphahla
KUYABE kungabizwa ozwayo mhlaka 9 Mabasa eLearnmore Hillbrow kweleSouth Africa lapho umculi weDisco Music uGettie Diamond odabuka eFilabusi kuleli azabe esethula imbabazane ye-DVD ethi Uziqhenye.
Umculi lo odume ngokuthi nguGettie Diamond noma nje igama lakhe lokuzalwa kunguGetron Sibanda uthembise njalo ukuthi uzabuya njalo kuleli ezojabulisa uzulu ngomculo wakhe kanye lokuwuhaza emphakathini.
Idlalade elitsha leli lilengoma eziyisikhombisa.
UMthunywa uxhumane lomculi lo wachaza ukuthi okwenza akhiphele iDVD yakhe ekweleSouth Africa yikuthi ukhulele khona njalo ufunda khona.
“Okwenze ukuthi iDVD yami le ngiyikhiphele lapha kweleSouth Africa yikuthi ngakhulela lapha noma nje ngafika sengifunda. Okunye njalo yikuthi ngifunda khonapha ngakho ithuba lokuyakhiphela kithi eZimbabwe kangilitholi.
“Ngaqala ezomculo ngilapha kweleSouth Africa ngakho ngibone kungcono ukuthi ngiphakulele abalandeli bami bakuleli kuqala iDVD le,” kutsho uGetty Diamond.
Uthe uzazama ukusabalalisa umculo wakhe lanxa esacathula njalo esesemfitshane ngoba eleminyaka engu-16.
UGettie uqhubekele phambili njalo waveza ukuthi ingoma zakhe wazisungula eyedwa noma nje egida labanye njalo iDVD le ilengoma eziyisikhombisa.
“I-DVD engizayethulela abalandeli ngoMgqibelo ilengoma eziyisikhombisa ezisedlaladeni engilikhiphe kunyanga ezimbalwa ezedluleyo. Lonyaka ngikhangelele ukuyatshayela abalandeli bami abaseZimbabwe njengoba nje ngidabuka khona,’’ kutsho uGettie Diamond.
Ekhuluma loMthunywa uDJ Mapressor omunye wabancedisana loGettie ekukhipheni iDVD le uveze ukuthi uyajabula kakhulu ngomsebenzi owenziwa ngumculi lo.
“Umculi lo wenza umsebenzi omuhle kakhulu ngakho ngimkhuthaza ukuthi aqhubekele phambili ngawo ngoba uphakamisa isizwe sakithi koMthwakazi.
“Okungijabulisa kakhulu yikuthi lami ngidabuka koMthwakazi ngakho ngikhuthaza uzulu ukuthi amxhase umculi lo ukuze uMthwakazi aphakame ngamandla,’’ kuphetha uDJ Mapressor.
Online Reporter