admin
YiNtatheli kaMthunywa
ZILOKHE zingelankani izakhamizi zeMashava koPita ngamanina amabili abhuqane kwabaluthuli ebanga indoda yomnikazi engumakorokoza, uMthunywa uyakuveza lokhu lamhlanje.
URuth Chiwaka loSinodia Gwadidzo babhulane badabulelana lezigqoko kuviki ephelileyo bebanga uTongai Ngwenya ongumakorokoza njalo othetheyo besendlini yakhe.
UMthunywa uxhumane loNgwenya othe yena kazingeni ezokulwa kwamanina la ngoba efuna nje ukungcolisa ibizo lakhe.
“Mina ngithethe, umkami usekhaya eShurugwi laba besizilibazisa nje pho ukuthi osokubenza balwe kuyini kangikwazi mina,” kutsho uNgwenya.
Intatheli iphinde njalo yaxhumana loRuth othe kwabaliphutha ukuthandana loNgwenya.
“Mina ngathandana loNgwenya ngingakwazi ukuthi ulemuli kodwa sengikwazi njalo kwabanzima ukuthi ngehlukane laye ngoba singaxabananga.
“Khathesi sesixatshaniswa ngusisi lo osifice sizijabulela wasiphambanisa.
“Mhlalokho uSinodia wafica sihlezi endlini loNgwenya wafika wangidonsa ngenwele ethi ngithandana lomkakhe yikho nje saze salwa,” kutsho uRuth.
Intatheli iphinde yaxhumana loSinodia yena oveze ubumunyu ngokuthi kafuni kujayelwa ngumuntu wesifazana njengaye okuyikho okwenze wamtshaya ngoba ngeke avume ukuthathelwa indoda.
“Ngesikhathi ngithandana lobhudi lo kangizange ngibone elonkosikazi lalobanje abantu babengitshela ukuthi ulaye.
“Kungakho ngisiya endlini ngangingayi kulwa laye kodwa ngangisiyazwisisa ukuthi lokho okukhulunywa ngabantu liqiniso lakanye ngazibonela-ke.
“Yikho kanye okwangicunulayo sacina sisilwa kodwa lo esasimbanga wabaleka waqala ukumemeza ukuthi yena uthethe njalo kafuni kuzwa ngathi yikho sacina sisekela ukulwa,” kutsho uSinodia.
Online Reporter