admin
Msilisi Dube
INHLANGANISO ebona ngempilakahle yezifuyo isikhuthaze abalimi ukuthi baphusise amaguqa ukuze inkomokazi zingacubi.
Linkuthazo iphiwe abalimi esigabeni seMatobo kuviki ephelileyo ngesikhathi inkomo zifakwa umtshiso.
Kubikwa ithole akumelanga lidlulise inyanga ezingu-10 lilokhe limunya ngoba lokhu kucina kubangela ukuba inkomokazi icube.
UDokotela wezifuyo, uThabani Sibanda uthe ukuphusisa amathole yindlela eqondileyo yokuvikela inkomokazi ukuba ingahlaselwa yimikhuhlane.
“Njengoba isikhathi sehlobo sesidlulile lapho okuyabe kulotshani obuluhlaza khona obunika inkomo ukudla kunye lamandla, kuqakathekile ukuba abalimi balungiselele ukuphusisa amathole abo asekhulile.
“Abalimi bangaphusisa amathole ngokuwafaka uqhweba emakhaleni, okulizenge elifakwa emakhaleni eguqa.
Umlimi uyabhoboza amakhala eguqa abesebophela izenge leli. Ngokwenza lokhu iguqa nxa limunya liyabe lisizwa ubuhlungu okwenza licine likhalala ukumunya,” kutsho uDkt Sibanda.
UDkt Sibanda uqhubekele phambili wathi umlimi angekela ukuphusisa amaguqa akhe inkomokazi zakhe zilakho ukucina sezicuba ikakhulu endaweni ezinjenge Matabeleland South, kunye leBinga lapho okusilela khona ukudla.
“Inkomokazi zingacaka kubanzima ukuthi zithengwe ngemali ephezulu ngoba isisindo sazo siyabe siphansi ngenxa yokumunywa.Okunye njalo inkomokazi nxa isicakile kubalula ukuba ihlaselwe yimikhuhlane.
“Ithole kufanele limunye okwenyanga eziyisithupha kuphela ngakho nxa selikulesi isigaba liyabe seliqinile ngoba selisenelisa ukuzidlela utshani,” kuphetha uDkt Sibanda.
Online Reporter