admin
Wayne Ncube
ABALIMI sebexwayiswe ngendlela zokugcina isivuno njengoba abanye babo sebeqalisile ukuvuna, nanko phela abanye bacina belahlekelwa ngenxa yokungazi indlela eziqondileyo zokuphatha isivuno sabo.
UPrincipal Agronomist kunhlanganiso yeAgritex esabelweni seMatabeleland North, uMnumzana Davison Masendeke uthe abalimi balahlekelwa yisivuno sabo ngesikhathi bevuna kanye lalapho sebesibeka eziphaleni.
“Kubalulekile ukulondoloza uhlonzi lwesivuno ngoba abalimi bandise ukulahlekelwa yimali ngoba isisindo siyabe sesehlile kukanti ukubukeka kwesilimo kuyabe kungasakhangi amehlo abathengi.
“Amagudwane, izinanakazana, amazolo lokutshisa kulakho ukuphambanisa isivuno umlimi acine elahlekelwa yimali enengi,” kuchaza uMnu Masendeke.
Uthe okungaphezulu lokhu kwenza abe-Grain Marketing Board (GMB) bangathathi isivuno somlimi ngoba balemigomo ebekiweyo yesimo sesilimo okumele basithathe.
“Kulobumazi obamukelekileyo besilimo kungakho ubumanzi besakho isilimo bungedlula lobo abesiphala selizwe kabasithathi ngoba bulakho ukuphambanisa ukugcinakala kwesivuno.
“Okunye okuqakathekileyo yikuba abalimi babe lolwazi lokugcina kuhle isivuno sabo ngoba ubumanzi kanye lokutshisa kwesiphala kuqakathekile kakhulu ekugcineni isivuno isikhathi eside,” nguMnu Masendeke lowo.
Uthe abalimi beZimbabwe abanengi bavame ukulahlekelwa kakhulu yisivuno sabo kakhulu ngesikhathi sokususa isivuno emasimini sisiwa esiphaleni langesikhathi sokuthengisa.
Uphethe ngokuxwayisa abalimi ukuthi ukuze bangalahlekelwa yisivuno bangesekeli sihlale kakhulu emasimini ngoba sicina sisonakala njalo umumbu ucina usiba lemitshiphela kanye lezinye izinanakazana, kungakho kuhle ukuthi benze ingalane.
Online Reporter