adminUmbuzo esilawo bafundi yikuthi yibaphi labobantu lo okhulumayo okungaba yimbongi akhuluma ngabo ethi kababoni? Ekuwuphenduleni lumbuzo sithola ukuthi okhuluma lapha ngosekhulile, osetshiywe ngabakhula bakhe, osowabo. Uselesizungu lumuntu ngoba osowabo abebephila bexoxa bonke abasekho sebedlula kulumhlaba.
Nanku-ke ephindaphinda inkulumo ethi, “Ngob’abantu engibaziy’angibaboni.”
Kuphindwaphindwa amazwi athi, “Ngob’abant’engibaziy’abasabonwa.” Useyathalaze indawo yonke kodwa phinde ababone abantu abaziyo. Usethalaze kumacele wonke womhlaba, usekhangele enyakatho, empumalanga, eningizimu lentshonalanga kababoni abantu abaziyo. Uyavuma ukuthi usesele yedwa kulumhlaba ngoba abantu abaziyo kababoni. Kusobala ukuthi sebatshona abaziyo yikho kuzwakala ukuthi ulesizungu esikhulu sokuswela abaziyo.
Umi enzikini yedolobho lakoBulawayo lapho okudlula khona abantu abanengi. Banengi kakhulu abantu abedlula lapha emi khona ngoba uthi bayanyakazela abantu okwetshebetshebe likaGwayi. Yisifaniso lesi esifanisa ubunengi babantu letshebetshebe lomfula uGwayi. Yisiphithiphithi sabantu abanengi bedlula lapho besiyale lale. Ngenxa yalokho ufikelwa lithemba lokubona oyedwa umuntu amaziyo phakathi kwesinyokotho leso.
Uthemba ukuthi uzabona nje oyedwa amaziyo axoxe laye bakhumbuzane indaba zabo zakudala. Isimanga yikuthi phakathi kwalelo xuku elikhulu kangaka elabantu lutho ukumbona loyedwa amaziyo. Lokhu kuyamdanisa kakhulu avume ukuthi udanile njalo ulahlekelwe lapha emhlabeni ngoba bonke abaziyo kababoni. Nxa ekhangela lapha emhlabeni ubona ukuthi bonke abantu afunda labo kababoni. Lalabo akhula labo yinto efananayo ngoba kababoni.
Kahlalanga phansi lumuntu kodwa uyabhodabhoda edinga labo akhula labo njengomduna wendwangu edinga labo abaziyo kodwa kababoni ngoba abantu abaziyo abasabonwa. Sekunjalo lumuntu uya ezinkonzweni lapho athi uzithuma khona. Inhlansi yethemba nxa eselapho iyafika, iyavuka ebona angathi basenkonzweni labo abaziyo kodwa ithemba liphele ngoba kahlangani labo enkonzweni lezo.
Esehlulekile ukuhlangana labo enkonzweni labo abaziyo, uzama emabhawa ngoba lapha usewabhodile amabhawa wawaqeda ithemba lokubabona abaziyo likhule kanye legunya lokuthi uzababona. Kodwa lakho lapha kahlangani labo abantu abaziyo khona kulawo mabhawa. Sewabhodile amabhawa amakhulu lamancane ethi uzabathola abaziyo kodwa phinde abathole. Isizungu esikhulu simphethe yiso esesimthuma ukuthi adinge izihlobo labangane kodwa kahlangani lazo izihlobo zakhe kunye labangane bakhe.
Lemaphethelweni enkondlo uyavuma lumuntu ukuthi abantu abaziyo kababonakali. Seyihambile lendlela yekhaya ethi kumbe uzaqeda isizungu kodwa obaba labomama abaziyo kabasekho. Izintombi lamajaha lakho akusekho. Yena usesele eyintandane emhlabeni. Nxa usufelwe yibo bonke abantu, abangane lezihlobo ngeqiniso usuyintandane.
Useyintandane yoqobo lumuntu ngoba bonke abaziyo kabasekho.
Online Reporter