adminWena ofunda lokhu kuhlaziya izinkondlo lamhlanje qaphela ukuthi le inkondlo siyiqalisela phakathi kwayo lamhlanje.
Siqale ukuyicubungula kuviki edluleyo. Sikubeke obala ukuthi imbongi ikhuluma ngosuku oluzayo lokufa.
Imbongi ikhuluma ngomunye umuntu esithi luyeza usuku lokufa kwakhe. Singakulibali ukuthi kungaba yiyo imbongi ikhuluma ngosuku lokufa kwayo.
Lumuntu okhuluma lapha ukholwa kuNkulunkulu ngoba uthi kalitshunyayelwe ngamandla elilamandla. Nxa sikhangelisisa lapha lumuntu uthi kalitshunyayelwe ngamandla lona ilizwi likaNkulunkulu ngoba yena uNkulunkulu elamandla.
Lo ngumuntu okholwayo sibili okwaziyo ukuthi nxa sekufike isikhathi sokufa kumele umuntu abe ebuyisene loMdali wakhe uNkulunkulu. Njengoba isikhathi sokufa kwakhe sekuseduze akubiza ethi yisiphetho, uthi kazihlatshelwe ingoma ezaziwa ngamakhehla (amaxhegu) lezalukazi.
Uqhubeka ethi yizo laye azithandayo lezongoma kabakhangele laye ezicula (ezihlabela). Kulenkuthazo yokuthi laye kakhangelwe ecula.Njalo uthi kabasiqhinqe isililo bathokoze ngoba usuku lwakhe lokufa selufikile.
Uyakwazi lumuntu ukuthi nxa sekulokufa kuba lethuba elihle lokuthi izihlobo labangane bahlangane. Uqhubeka ethi izihlobo eziseduze kazithandane kakhulu labangane njengoba sekube lithuba elihle lokubonana lokuthokoza.
Lokhu kufakazwa ngamazwi athi: “Makube lithuba lokubonana lokuthokoza, abegazi labangane makube ngamathe lolimi.”
Lumuntu uthi uKhosithel’ kamphelekezele njalo amkhokhele ekufeni kwakhe. Luyamthokozisa usuku lokufa kwakhe ngoba uthi makudliwe kuhlekwe njalo kuhlelwe ngoba phela lakho kumnandi kuxoxwa.
Ukudla okudliwa lapho emfeni lakho kakube mnandi kunambitheke ngoba lokunatha utshwala kukhona lapho.
Umuntu lo uveza khona kanye okwenzakala emfeni zakhathesi lapha abantu abangasahloniphi ukufa bekuthatha njengendawo zokuhlangana labangane lezihlobo kudliwe kugidwe kungasazilwa.
Kusenjalo imbongi ithi lanxa kuphakathi kwentokozo leyo akuxoxiswane ngayo indaba yokufa kuthi omunye lomunye laye azinuke amakhwapha azihlole ukuthi ukulungele yini ukufa ngoba elokufa ilanga kalilungiselelwa.
Lokhu kugcwaliswa yisaga esithi elokufa kalitsheli.
Iyaphambili imbongi loba lumuntu ethi elokufa kalilindeli kanti njalo kalikhethi ngoba yena lingamkhethanga laye.
Uzimisele lumuntu ekufeni ngoba ukhuthaza unina uMaNgwenya ukuthi kathule angakhali. Uyamthanda unina ngoba umbiza ngelikasithandwa sakhe ethi kathule ngoba kathukwanga.
Unina nguMaNgwenya ngoba emthanda umbiza langesangelo sakhe ethi Mlambo. Utshela unina ethi liyezi elimembesileyo eveza lapho azalwa khona unina ethi ngowakoMalobe.
Uyakhuthazwa lumama ukuthi angazihluphi ngoba lokhu okumehleleyo kunjengeyezi lona elembesa umhlaba kodwa liphange linyamalale. Kuthiwa kathokoze lumama ngoba lokhu kufa komntanakhe lo liyezi lezulu njalo yisithunzi esiyophanga sinyamalale.
Uyaqiniswa njalo lumama etshelwa ukuthi kathule ame ngethemba lakhe nje zwi. Kuyasekelwa njalo ukuthi lumuntu likholwa sibili ngoba ucupha enye indima esencwadini engcwele iBhayibhili ethi, “Uthul’othulini sengiphindele mina.”
Batsho njalo abakholwayo bathi umuntu nxa esifa umzimba uyabuyela othulini kuthi umphefumulo lawo ubuyele kuNkulunkulu lapho ozakwehlulelwa khona.
Online Reporter