adminThabo J C Nkomo
Yini le imbongi ethi kabayidle beyivungula labo akhuluma ngabo? Nxa ngyihlolisis linkondlo ngibona imbongi icatshile kancinyane kulokhu esikujwayeleyo. Sasizwe abantu bekhuluma lamazwi bexwayisa abanye abangabe bephambanisa izifuyo zomuntu osetshonile kumbe okhona bemtshotshela izifuyo zakhe ukuthi kabayidle inyama yezifuyo lezo kodwa kabayidle beyivungula. Lapha bayabe bexwayiswa labo bantu ukuthi luyeza lolosuku lapho inkomo lezo ziyofuneka khona kodwa bengaselazo.
Nxa ngikhangelisa lapha imbongi ayikhulumi ngenyama kodwa ixwayisa abantu abatsha asebehamba ngonyawo olutsha okutsho ukuthi abasalandeli amasiko akwabo. Abasalandeli abakutshelwa ngabazali babo yikho-ke imbongi iyabaxwayise ukuthi abakwenze lokhu bezinanzelela njalo bakwazi ukuthi kuzaphela. Imbongi kuyiletha uhleko nxa ekhangela lokhu osekusenziwa yintsha yalamhlanje. Nantu uhleko lwakhe: ‘He-he-e! Kleke! Pekle! Petu!’
Imbongi ihleka kanje ngoba ibona iphutha elenziwa yintsha yalamuhla ephikisana lamasiko lemikhuba yakwabo.
Imbongi yenza angathi iyabancoma bona nzalo kaSikhendevana ngoba uthi bayadela aze athi, “Uthi liyakukhuluma yini bobhoyi? Likhomba ngophakathi njalo baphakathi komhlane lembeleko becwebezela.” Ngakho konke lokhu imbongi itshengisa ukuthi bahlezi kuhle abantwana bakaSikhendevana kabahlutshwa yilutho. Kodwa kasikhumbule isixwayiso ebapha sona imbongi ukuthi lanxa kukhanya behlezi kuhle kodwa bayidle beyivungula.
Imbongi ithi kabangachelesi okwedlulileyo ngokungalandeli amasiko abo ngoba kuza phela. “Liyidle liyivungula.”
Ukuthi bahlezi kuhle abantwana bakaSikhendevana kufakazwa yikuthi kuthiwa sebeze bekhohlwa layikubingelela abadala. Lokho kwenza imbongi ihleke ingahleki. “He – he- e! Kleke! Pekle! Petu! Bachelesile abantwana bakaSikhendevana imbongi ize isebenzise isaga esithi, “zimbiwe ngulinda mahlabezulu Ndwangu ndini uyidobhephi leyompembe?”
Kulokujabula okukhulu ebantwaneni bakaSikhendevana okuze kufaniswe lokuthaba kwendwangu ethi ingadobha impembe ihambe iyitshaya iganga lonke ize ibalekelwe langezinye. Lanxa kunjalo imbongi ikhetha ukuzithulela kodwa iqine ngesixwayiso sayo sokuthi abayidle beyibeka amathambo ngoba lengungu layo ungayizwa isikhala kakhulu isiyadabuka. Layo intsha le isintshantshuze kakhulu okutshengisa ukuthi lanxa ingalandeli amasiko kodwa kuzayiphelela.
Imbongi ima ngokuthi khonokho intsha ekwenzayo ukuphikisana lamasiko kuzaphela yikho nje esithi, “Liyidle liyibeka amathambo.” Abatsha kabenze lokho abakwenzayo kodwa bakwazi ukuthi kuzabaphelela. Imbongi iyababuza-ke abatsha ukuthi kanti vele benzani njengoba kukhanya sebenyela emthonjeni abanatha kuwo. Intsha kayisahloniphi abadala kunye labazali bayo ngo befaniswa lenkhukhu yona edla isesulela phansi. Imbongi iyabuza kuntsha ukuthi yenza lonke lelihlazo ithembeni?
Imbongi iyayikhumbuza intsha ukuthi kayazi yini ukuthi ubukhosi ngamazolo? Lesi saga sichaza ukuthi yonke into iyaphela. Ungabe unothile lamhlanje kusasa kuvuke kukuphelele. Imbongi iyayikhumbuza intsha ukuthi kusasa layo ingavuka isiphakathi kobunzima. Bengavuka sebengabakhalayo beqhunsa isililo
Online Reporter