admin
BABEQINISILE abezolo besithi induku kayakhi muzi ngoba bananzelela ukuthi ngeqiniso iyawuchitha kusale kungasela ngitsho ulutho olutshengisa ukuthi umuzi ubumile. Nyakenye ngesikhathi sokuvinjwa kwabantu emakhaya amacala okuhlukuluzana emakhaya aba manengi. Lokhu kwabangela ukuthi amapholisa, inhlanganiso ezizimeleyo ezibona ngamalungelo abantu zicine zihlaba umkhosi zifundisa abantu ngobubi bokuhlukuluzana emakhaya.
Njengoba khathesi siphakathi kwenye njalo i-lockdown izimuli zingabe zihlezi kuhle na emakhaya kumbe njalo yimikhosi yodwa ebusuku lemini?
Kambe sona isibindi sokuhlukuluza omunye wakho owake wamtshela ngomlomo wakho ukuthi uyamthanda uyabe usithethe ngaphi? Okudanisayo yikuba kwandile ukuthi obaba babe yibo abahlukuluza omama kunye labantwana emakhaya? Kuyabe sokungene moya bani bobaba lize lenze uchuku olungaka?
Siyazi ukuthi njengoba inengi labantu kuleli liphila ngokuthengisa kodwa lokho akutsho ukuthi njengoba ukuthengisa lezinsuku kuvaliwe sokumele ulaka lolu lokuswela imali lwehliswe phezulu kwabomama kanye labantwana?
Kuhle ukuthi abantu nxa behlezi bafunde ukukhumisana umlotha emakhaya. Lokhu kuqakathekile kakhulu njalo yiyo imfihlo enkulu eyokwakha umuzi. Ukukhulumisana nxa kukhona okuhluphayo njengabathetheneyo kuyawakha umuzi kodwa ukuthwalelana amahloka kanye lezinduku kuyayichitha imuli.
Ngokufanayo sikhuthaza labesifazana labo ukuthi baxekane lokulwa labomkabo babo ngoba konke lokhu yikho okucina kubangela ukuthi amacala okuhlukuluzana emakhaya abe manengi. Nxa isimo sisibi kuhle ukuthi abathetheneyo babambisane njalo bakhulumisane lokhu kuzenza umthwalo ubelula.
Ukusebenzisa imbazo nxa kukhona okuhluphayo emakhaya akuncedi ngalutho ngoba yikho okucina kubangela ukulimazana loba ukufa kweminye imizi.
Indoda qobo lwayo njalo ehlakaniphileyo ayisebenzisi induku ekuqedeni ukungazwisisani. Owesilisa owenza lokhu utshengisa mgceke kuzulu ukuthi uyehluleka ukumelana lengxabangxoza esemdenini wakhe ngendlela ehloniphekayo lasesintwini.
Yikho izolo bekulabobabakazi kumbe omalume abayibo abakade bebizwa ukuza xazulula lokhu osokuhluphile emulini. Kanti pho lamuhla kwehlulani ukuthi abathetheneyo benze njengezolo ekukhulumisaneni? Ngalokhu bobaba lumkhuba wokudutshuza njalonje omkenu emakhaya kumele like liwuyekele ngoba ulihlazo. Sikhuthaza ukuthi abafundisi batshumayele ngamandla ivangeli ngobubi bokuhlukuluzana emakhaya.
Kungumbono waleliphephandaba ukuthi lalo ohlukumezwayo, kumele aphange abikele abomthetho, abadala, abakhokheli bezigaba kumbe njalo baqonde kubafundisi bayedinga uncedo bangaze bafela ngaphakathi njengephilisi belokhe beziduduza ngokuthi umendo awuthunyelwa gundwane. Bomama insuku zokubekezela usekela ukubhokoza ithumba olalo elikufuthelayo sezedlula, yebo kumele ugcine abantwabakho kodwa hatshi emzini lapho ohlukuluzwa khona ngoba labantwana labo bacina sebehlukuluzwa ngulo okuhlukuluzayo.
Kungakho kuyabe kuqondile ukuthi uhlupho obhekane lalo ulwazise abanye ukuze uthole uncedo hatshi ukuthi kucine sekulesidumbu phansi.
Online Reporter