Online Reporter
Ugwalo: Umendo
Olulotshwe NguBarbara C Makhalisa
Izifundo ziyaphethwa
Sikhumbuzo Dabengwa
Ekuqaleni kwesihloko sikubethile ukuba izifundo ziyavela kuzimilo zabalingiswa kanye lakwezinye izehlakalo kugwalo. Esinye sezifundo esizitholayo ngesokuba kubi ukweyama kuzihlobo zomkakho wena ungabi lalutho olalo.
Sibona uGugu kugwalo ehlala loyisekazi kaNdaba owayelima elamasimu kodwa uGugu wehluleka ukucela ukusikelwa insimu ukuze azilimele ukuze azuze ukudla okusetshenzwe nguye .
Siyafunda njalo ukuba nxa uyintombazana ezakwenda, ungendi wenze njengoGugu owavuma ukuhlala ekhaya umkakhe ehlala edolobheni. Sibona uGugu kugwalo ehlala ekhaya endaweni yokuba ayehlala lomkakhe edolobheni.
Sibuye sifunde ukuba ukungazi ngamalungelo akho njengomuntu otshadileyo kuyabulala ngoba ungenziwa isichaka endaweni yakho. Sibona uGugu elaliswa emkulwini kodwa indlu ithengwe ngebizo lomtshado ongowakhe loNdaba.
Siyaqhubeka siphiwa ezinye izifundo ezinjengokubekezela ekuphileni .Siyafundiswa ukuba ukubekezela kulenzuzo. Sibona uGugu ebekezela lanxa uThulani wayesetshiseka ngokumthatha yena wala ngokuhlonipha umtshado lezifungo zakhe, akaze wawesula waze wadlula uNdaba. Lokhu kupha isifundo sokungajahi ekwenzeni izinqumo ezilomthetho obophayo kusasa.
Siyafunda njalo ukuba ukwenziwa isichaka ngomunye kungenye yezindlela uThixo azekukhuphula ngayo. Sibona uNdaba ehlukuluza uGugu acine ecabanga ukuyadinga umsebenzi eGweru kanti loMaZulu laye wenza okufanayo ngokumhlukuluza embalisela ngokudla kwakhe kwacina kudala ukuba uGugu azibonele empilweni..
Siyafunda njalo ukuba abanye ukufa okusekhaya akubahlukumezi lakancane ngenhliziyo zokunganaki. Sibona uNdaba engathinteki lanxa usane lwakhe seludlule lumhlaba. Uqhubeka ebisa ikhikhitha endlini ezile okwamalanganyana kuphela. Wala lokuthengela uGugu inzilo. Siyafunda njalo ukuba imikhuhlane enjengendingindi, umkhuhlane wabantwana, udinga ukulimukwa masinyane ngezibonakaliso zawo ukuze sigweme ukuhluthunwa kwabantwana yikufa. Sibona uGugu egulelwa ngumntwana ekude ekhaya aze azuze usizo esibhedlela emva kwamalanga umkhuhlane usuxhwalile.
Ukwesaba obaba ngomama abendileyo kudala ukuhlukumezeka kwabantwana abasanda kwenda. Sibona uGugu ezama ukuyabikela abemuli yakhe afike axotshwe. Unina wehluleka ukugcizelela udubo lukaGugu kuyise wavela wesabela khatshana ukuyimela lindaba kuyise womntwana. Kuyavela njalo ngakundaba yokuqhubeka komntwana esikolo lapho uyise laye behlukana kumbono kodwa yena wakhetha ukungaphumeli egcekeni .
Siyafunda njalo ukuba ukulahla imuli yakho yikuvulela omunye amathamsanqa empilweni. Sibona kugwalo uNdaba elaxaza umkakhe ethathana lamakhikhitha otshwala edolobheni. Lokhu kwapha uThulani ithuba lokungena ngenxeba kunhliziyo kaGugu. Ucina ethobe amanxeba ayedalwe ngumkakhe ngokungananzeleli.
Siyafunda njalo ukuba omakhelwane balusizo ekuphileni. Sibona uGugu esizwa ngumakhelwane wakhe koBulawayo kanye lasekhaya ephakathi kohlupho. Bayamgcina bamuphe indawo yokumelela uNdaba, ecatshele umqando endlini kanti abasekhaya babembumba bemupha amacebo okwenza kanye lokumupha imali zokuyaqaza umkakhe.
Asihlanganeni kwelizayo bafundi.
