admin
Silo Ophezulu Stinta
Kundatshana yethu Awumbiwa Ndawonye sitshiye uDuvuza lowangakwakhe uNomasiko bethekelelwe yizethekeli ezithi ukutshwaqisa umzimba obekusalindeleke ukuthi zitsho lokho ezihamba ngakho.
Enye yalezinsizwa ezimbili yazibika kuDuvuza ukuthi yayi ngumnewabo kaMkhuphula nkunzi ovela ngaseGoli. Lelogama lavela lamtshayisa ngovalo uDuvuza wathi ukucabanga emuva ngemizuzu emlutshwana.
Lapho wayesecabanga ukuthi mhlawumbe uGcaleka lo wayesezemhlasela ngokufa komfowabo uMkhuphulunkunzi. Wakhumbula mhlophe nje ukuthi uMkhuphulankunzi wayengomunye wamajaha owayembangisa lapha entombini yakhe uNomasiko.
Wayelendelelo embi ke ngoba wayelokhu ekhombisa uNomasiko lalapho esezwile ukuthi usengumakoti wakoMakhoba. Yikho kanye okwaqubula ulaka kuDuvuza okwenza ukuthi lalapho emfica emfuleni ngenye imini wavele wamjuma ngomkhonto isidumbu sakhe wasiphosa emfuleni.
Icala kaliboli sitsho njalo isitsho sabadala. Pho njengoba nje wayeyedwa emfuleni ekwenza lokhu osekulethe uGcaleka kuleliguma lakwabo yini, ngoba nje wayesitsho lokutsho ukuthi ukuzophenyisisa ngokufa komfowabo.
UGcaleka akakhekhelezi uyibetha ekhanda etshaqisa inwele pg 27. Ngize ukuzokhokhisela igazi lomfowethu elachitheka ngendlela engaqondakali. Lamazwi aphosa adabula phakathi uDuvuza owazama ukuziqinisa njengendoda.
Waqhubeka engakhethi gama uGcaleka waze wayidubula indaba ukuthi wayekwazi mhlophe ukuthi umfowabo wabulawa nguye uDuvuza ngenxa yobushimane. Wayelande impi hayi ukudlala uGcaleka.
Ngelipholileyo uDuvaza wabeluleka ngesiko lesintu ukuthi lokho ababekwenza kwakuyikudelela umuzi wakoMakhoba ngendlela ephezulu. Siyakwala laso isintu kanye lomthetho ukuthi uhlasele umuntu emzini wakhe. Wabanika impendulo yokungazani lokufa kukaMkhuphulankunzi.
Wabacela ukuthi baphume nje baphele kulo muzi wakwabo ubakhomba isango nje evele ephethe umbhobho okwenza laba ababili baphume beselekana beqonda ngasesangweni.
Engakaphumi uGcaleka wanyemuluka ekhwaza ukuthi yena ubelande iqiniso qha njengoba engafuni kulitsho nje aze alibambe lingakatshoni.
Kwakungamazwi agcwele ukusonga lokulwa lawo.
Online Reporter