admin
Siqhubeka ngokukhangela ukuqhakatheka kwemibhalo engalotshwanga lapho sinanzelela.
Ngeviki edlulileyo sike sathinta ukuthi inganekwane zisivezela imbali yemvelo thize lapho esike saxoxa khona ngenganekwane yembila eyaswela umsila ngenxa yokulayezela. Enye njalo inganekwane ekholisisayo yinganekwane yesiphongo sendwangu.
Ngokuqapheliswa langokufundiswa ngobuvila kudala indwangu zakhulelwa yibuvila obumangalisayo lapho ezinye inyamazana zisiya emasimini zona zazitshona zilele kuthe ke ngenhloni zokubhekana labo makhelwane zathatha amakhuba zizivala amehlo ikhuba lahle kwaba yikunamathela esiphongweni kuze kube lalamuhla, indwangu zahle zaba lophawu lobuvila.
Yisifundo esiqakathekile esikhuthaza ukuthi abantu basebenze gadalala empilweni bangabi ngamavila ngoba ubuvila bulophawu olungeluhle.
Izolo ke abantwana bebefunda baqaphele befundiswa ngazo inganekwane lezi. Kwakuqakathekile ukuthi balimuke amaqili angaze aba qila ngezenzo zawo ezimbi,njengoba kusaqakathekile lakhathesi nje ukuthi abantwana balimuke amaqili njengoba amaqili ephila phakathi kwabantu.
Ngokulandela inganekwane kakhanka elathathela iwabayi iqatha ngobuqili,yinganekwane exwayisa abantwana ngobuqili abangahlangana labo ekuphileni kwabo, njalo kuyisixwayiso ukuthi balalele amazwi avela emlonyeni yabantu etshiyeneyo ngoba yiwo njalo lawo mazwi abafaka emjibeleni. Umntwana wonke kuqakathekile ukuthi angabi ngulowo oqileka lula nje empilweni.
Online Reporter