admin
NGEVIKI edlulileyo sitshiye sifunde ngokuzalwa kanye lokukhuliswa kukaMlahlwa, intandane qho ekhula iziphandela abazali bayo besidla amabele.
Uswazi lwaluyikudla kukaMlahlwa mihla lamalanga, loyisemkhulu evele engahlali phansi uMaSibanda ugogo ongazali ngitsho lonina wayezithaphuzela sengathi uhlungiwe kungakhathalekile ukuthi nguye ophambanisileyo kumbe ephanjanisiwe wayebizwa ngawo wonke amagama okuswela Ubuntu engumswela nhloko, engumthakatshana exotshwa ngekhaya ayetshona egangeni kungabi ndaba zalutho.
Phezu kwegama likaMlahlwa wayesebizwa ngelithi Mswelanhloko, pho umntwana wayengakhula engumuntu onjani ehanqwe yibunzima obunje.
Sinanzelela ukuthi lalapha impilo yesithenjini iyaqhubeka lalapho okwakuzalwa khona uKhonzaphi kambe uMaSibanda nxa ebambela usana olunguMlahlwa izikhwili ezingaka, aze alinde lokuthi mhlazana uyisemkhulu engekho amtshayele ukubhodla kwakungela njongo yokwakha kumbe ukukhulisa umntwana okwakhe kwakuyikulwa losana ebambela usana izikhwili sengathi ngumuntu omdala.
UMlahlwa utshaywa aze abotshelwe esihlahleni. Isihluku esibuhlungu esatshiya lomdala uNkala ekheme owangaphansi okokuthi ngabe wayengabuyanga ekhaya ngalobo busuku uMlahlwa wayezavuka eqanda njengoba nje sibala ukuthi waze waqina ngemva kwamaviki amahlanu, okuchasisa ukuthi ikhaza lalimngene ngendlela ephezulu.
Siyananzelela ukuthi izolo isithembo besivamile okwamagama, kuthi labesilisa laba abebethatha abafazi abanengi bebebona iziga ezigilwa ngamakhosikazi abo kodwa asiboni esiba khona ofunda kikho konke lokhu babeqhubeka nje kungabi ndabazalutho. Ubuhlungu obukhulu esithenjini lapha yikuhlukunyezwa kwabantwana yikho okukhanya kuvamile.
Online Reporter