Online Reporter
Ugwalo: Umdumo wenkondlo elalotshwa ngu N.S Sigogo labanye
Inkondlo: Yeka Inzondo
Eyalotshwa ngu M M Sibanda
Ophezulu Stinta
Injongo
Ngokuloba inkondlo le imbongi ibihlose ukuxwayisa abantu ukuthi bayekele ukukhulelwa yinzondo kumbe ukuvumela inzondo ukuthi ibathumbe.
Akulanto enhle ngitsho ehamba lenzondo, ilimaza inhliziyo zabanengi zisale zichinca igazi.
Inzondo ichithiza ngitsho lokuhle okwelizwe okukhangelelwe ukwakha ilizwe khona kuyachithiza.
Lokhu kufinyelela nje lasemakhaya abantu abazakhele wona kusobala nje ukuthi lesi yisifo esingahambelani lengqubekela phambili, ngakho kayilahlwe ingathelelwa ngitsho.
Enye injongo emqoka ehloswe yimbongi lapha yikuthi lapho esibona khona kungasela sisa, sekwaphela insini kanye lesihawu abantu baziphe ukuqondisisa ukuthi lokho kuyabe kuyimbangela yenzondo kungekho okunye.
Ukuth usekhon’ umthombo ogobhoza isihel’ lesisa
Ochinc insini lesihawu
Ukuth’ asekhona amazw’ amahle oxolo?
Isicaphuno lesi siveza sobala ukuthi inzondo ilimaze abantu abanengi ngakho labo abalimeleyo kabalacala labo benziwa ngumumo lokuthi bazithole sebeyilabo abangela musa labangela xolo.
Kudinga bazwisiswe njalo bancediswe ngoba inzondo yisimo umuntu wonke afisa ukuphuma kuso kodwa engela mandla okuphuma kumbe ukuzikhupha kunhlungu zenzondo.
Imizwa
Ekufundeni inkondlo le siyananzelela ukuthi imbongi yona ngokwayo ibilemizwa ethile kubuye njalo lathi esiyifundayo inkondlo le sibe lemizwa ethile equbukayo ngaphakathi. Sizaqala ngokuxoxa ngemizwa yembongi.
Imbongi iveza imizwa yokucaphuka, icatshulwa yiyo inzondo le.
Nguban’ ebantwini benkosi oke waziswa watuswa?
Akunsila, Amaya nje?
Yiyo lintondini, yiyo zwi, engumthangal’ oyinqaba omi uthi klwi
Imbongi ifuthelene mpela, ngendlela ebiza ngayo inzondo le sengathi ayila gama yinto ndini nje.
Imbongi ibuye njalo izizwe isilahle ithemba lapho isithi:
Kambe usekhona umthombo ogobhoz’ isihelo lesisa,
Ochinc’ insini lesihawu.
Akusekho okuhle imbongi ekubona kungaphuma ebantwini ngenxa yenzondo, akuselathemba njalo ukuthi kungaba
khona okuhle okungaphuma kumbe okuzaphuma, ithemba lonke selitshabalele.
