adminYiNtatheli KaMthunya
INHLANGANISO yeZimbabwe Paralympic Committee isikhuthaze abadlali abaphila lobugoga ukuthi batshiyane lokukhonona.
Kubikwa abadlali abaphila lobugoga sebesaziwa ngokukhala kakhulu endaweni yokuthi batshengisele ithalenta labo.
UMthunywa uxoxisane loLewis Garaba oweZimbabwe Paralympic Committee othe usenanzelele ukuthi labadlali abanengi abalethalenta abaphila lobugoga bazikhangelela phansi.
Uthe inhlanganiso yeZPC ikhathazekile ngokuthi akusela badlali abatsha abaphumelelayo. Imbali yokuphumelela kwabaphila lobugoga kwezemidlalo iphelela kuElliot Mujaji ogijimayo loNyasha Mharakurwa owethenisi.
“Ukuba ngumdlali uphila lobugoga akulula kodwa kulemali. Njengabantu bonke abaphatheka kwezemidlalo, ekuqaliseni akukho lula. Ngokuya kwesikhathi langokuzimisela, umuntu uyayenza imali,” kutsho uGaraba.
Lomqondisi wemcintiswano yezokugijima uEnias Nhoro uvumelane lo loGaraba wathi kuzamele kuhlandla lesikhombisa lamaParalympics, lonyaka lilungisise loludaba.
UNhoro, uthe abadlali abaphila lobugoga akumelanga bahlale behlengezela inyembezi ngoba uHulumende kasoke abaphathise mihla yonke.
“Ukudlalisa isikhathi sikhala ngokuthi asiphathwa kuhle akuphele. Nxa umuntu ephila lobugoga engumdlali sekumele azi ukuthi angenza imali enelise ukuziphilisa yena lemuli yakhe.
“Nxa uhlakaniphile uyayenza imali. Siyazi ukuthi kulabantu abathi abaphila lobugoga asibaphathi kuhle kwezemidlalo. Ngamanga lawo. Kumidlalo yamaParalympics sibaphatha njengabadlali bonke.”
Kusenjalo, inhlanganiso yeSports and Recreation Commission ithi iyasuthiseka ngomsebenzi wekhomithi ephethe imidlalo yalonyaka.
Online Reporter