Ukulinywa kwe-ginger

Ethel Ncube

I-GINGER yisilimo abalimi abangasilima sibalethele inzuzo enhle kakhulu.
Lokhu kukhulunywe nguMnumzana Mduduzi Dube ongu-Agronomist kunkampani ye-AgriSeeds.

Uthe abalimi kumele bazame ukulima i-ginger ngoba ilenzuzo futhi yenza kuhle ngesikhathi sokutshisa.
“I-ginger yenza kuhle ngesikhathi sokutshisa njalo sikhuthaza abalimi ukuthi bayilime endaweni elomumo womkhathi odlalela phakathi kwe-18 kusiya ku- 27 degrees Celsius.

“Kukanti ivuma emhlabathini olivutshevutshe obuye ube lobumunyu obuphakathi kwe-6.0 kusiya ku-6.5 njalo kayifuni ndawo elamanzi amanengi,” kutsho uMnu Dube.

Uqhubekele phambili esithi inhlanyelo ye-ginger zimpande (rhizomes).
“Inhlanyelo ye-ginger zimpande njalo sikhuthaza abalimi ukuthi baqale baziwomise bengakazihlanyeli njalo bazifake kuma-tray bengakazihlanyeli zithi-ke zingahluma sebengayazigxumeka emasimini abo.

“Nxa isihlanyelwa abalimi kumele bavule imizila njalo yehlukaniswe nge-15 kusiya ku-30cm emzileni,” kutsho uMnu Dube.

Uthe ukhuthaza abalimi ukuthi bakhiphe ukhula emasimini ukwenzela ukuthi lungaphambanisi ukumila kwezilimo.

“Sikhuthaza abalimi ukuthi bakhiphe ukhula besebenzisa ikhuba ngemva kwamaviki angu-6 kusiya ku-8 behlanyelile njalo bekhiphe ngonanzelelo ukwenzela ukuthi bengaphambanisi impande zabo,” kutsho uMnu Dube.

Uthe i-ginger ilezibungu ezinlutshwane njalo ukhuthaza abalimi ukuthi befafaze izilimo zabo ukuze bebulale izibungu.

“I-ginger ihlaselwa yizibungu ezigoqela o-shoot borer, leaf roller kanye le-scales njalo sikhuthaza abalimi ukuthi befafaze izilimo zabo besebenzisa umuthi okuthiwa yi-malathion kanye le demethiote ukuze babulale izibungu lezo,” kuphetha uMnu Dube.