admin
Joel Ndlovu
ABAFUYI benkomo sebekhuthazwe ukuba banakekele kuhle inkomo zingahlukunyezwa yikutshisa ngoba zingahlumezeka ziyabe zingasehlisi zicine zingasadli okuzenza zicake.
Ekhuluma lentatheli kaMthunywa uMnumzana Patrick Sibanda oyincitshi kwezokufuya lokulima esabelweni seMatabeleland North uthe ukuhlukumezeka kwenkomo okubangelwa yikutshisa kwenza zingehlisi uchago olunengi.
“Inkomo ezandise ukuhlukumezeka ngenxa yokutshisa yilezo ezehlisa kakhulu okucina kubulala ibhizimusi yomlimi ngoba iyabe ingasehlisi ngendlela ekhangelelweyo.
“Ukutshisa kuyehlisa i-protein echagweni iphinde yehlise i-somatic cell count (SCC) le solid not fat (SNF) enkomeni yochago.
“Ngenxa yesizatho lesi inkomo iyabe ingasehlisi yikho kubalulekile ukuthi inkomo yakhe ihlaliseke epulazini njalo ingahlukumezeki ukuze ingekeli ukwehlisa okuyikho okulethela umlimi ibhizimusi,” kutsho uMnu Sibanda.
“Inkomo azidli njalo azinathi manzi nxa zikhathazekile ngokutshisa. Zidla mbijana njalo ziyatshona zilele zingela mandla.
“Nxa zingadli inkomo kubangela inkinga enkulu ngoba nxa zikhona ezigulayo eminye imithi yokwelapha isebenza kuhle ingathelwa emanzini ihlanganiswe lokudla, ngakho nxa ingasadli inkomo ngeke isile njalo kungenzakala ife umfuyi alahlekelwe yinzuzo yakhe.
UMnu Sibanda uqhubekele phambili esithi inkomo zingahlukunyezwa yikutshisa njalo nxa kuyikuthi zisiwe kwenye indawo ezingayijayelanga.
Uphethe ngokuthi nxa inkomo zithengiwe akumelanga zihle zihlanganiswe lezinye ebezivele zisesibayeni masinya.
“Okunye okwenza inkomo zihlukumezeke yikuthi ziyabe zihlanganiswe lezinye kuse masinya zicine zisilwa.
“Ngakho-ke kuqakathekile ukuthi umfuyi ahlalise asanda kuzithenga zodwa okwesikhatshana abone ukuthi ziyajayela yini indawo entsha,” kuphetha uMnu Sibanda.
Online Reporter