Online Reporter
Sikumbuzo Dabengwa
Amhlophe athe nke mntanami. Lamhlanje usiphathele indondo ngokugijima mntanami. Ukuzala yikuzelula kanti abanye bathi ukuzala yikuzimbela.
Besingazi ukuba ukugijima kungasilethela izindondo ekhaya. Kuhle kuyabukeka lokhu. Siqakeza izandla singaqedi.
Olutshaya umpululu ngolwenza njalo kwazise umfana uphume wabaluhlamvu abanye ebatshiye le.
Zinengi izindondo ezemukelwa ngabantu ngezikhathi ezehlukeneyo. Abanye bemukela ngenxa yokuhlabela.
Abanye bathatha ezokulima. Abanye bemukela ezesikolo ekufundeni ikanti abanye baphiwa ezokwenza kuhle emsebenzini.
Zonke zibuya kube lokuhalalisela okukhulu ngoba kuyisenzo esihle ukwenza umsebenzi omuhle uze uphiwe isipho esinjengalesi.
Yisipho sokucina kuzipho eziyisitshengiselo sobucwephetshi obukhulu, ubungcwethi obukhulu.
Kungakho kuyadingeka ukubonisa uluntu ngokusukuma, ukuqakeza, ukutshaya imvokloklo kanye lompululu ovela kuzalukazi, ebafazini.
Nampa abathole iziqu zabo. Bemukelwa njani?
1. Udadewethu uphumelele emihlolisweni yakhe yenyuvesithi. Ubuye lesicoco semfundo ephezulu lengowane yemfundo ngokwayo.
Ohlangana laye uthi . . .
a) Langalezo dadewethu. Uphumelele!
b) Amhlophe athe nke dadewethu.
c) Yikho ukusebenza lokhu, hatshi ukuthutsha lezisu njengabo Sihle laba!
Impendulo yinye ngayinye utshengisa similo bani kokhulumayo.
2. Indodana kaMaSibanda ibizelwe isiqu sokuba ngumaqhuzu olombono kulabo abezamankampani amancane.
Ohlangana laye uthi . . .
a) Uyasebenza ndoda, ibizo lakho silibona kude. Qhubeka usiphakamisa. Kuhle imihlolo lokhu!
b) Kanti okwenzayo kuyabonakala ndoda? Besingazi.
c) Amhlophe ndoda. Qhubeka usebenza nzima.
Impendulo yinye ngayinye itshengisa similo bani kokhulumayo?
Kuyavela ukuba abantu bemukela izindaba ezinhle ngokutshiyana. Abanye bayemukela okuhle , abanye babulawa ngumoya othile othiwa ngumhobholo. Mubi. Asibukeni okuhle.
