Online Reporter
ISIBALO sasebesayine ukwesekwa umkhankaso wokuthi intombazane esencane (7), eyaziwa ngelokuthi Cwecwe, ithole ubulungiswa sesifinyelele ngaphezulu kwe-900 000.
UCwecwe kubikwa ukuthi wadlwengulwa emagcekeni esikolo eBiergville College, eMatatiele, e-Eastern Cape ngoMfumfu (October) nyakenye, ngesikhathi elinde imota eyayizomthatha imuse ekhaya, esuka esikolo esizimeleyo.
Lesi sehlakalo simise abanengi ezinkundleni zokuxhumana okubalwa kubo losaziwayo ngemva kokuba unina wengane eveze intukuthelo ngendlela isikolo esisingathe ngayo loludaba. Kusukela izolo lalamhlanje kunamamatshi ezindaweni ezehlukeneyo eNingizimu Afrika, ukweseka umndeni lesisulu. Unina wengane, ekhuluma kwenye yama-podcast, wabika ukuthi isikolo sehlulekile ukusingatha ngendlela efanele uphenyo. Uthi esikhundleni salokho, isikolo siqoke ukubanika incwadi yokuthi ingane iyefunda kwesinye isikolo, lakuba bebengayicela abazali.
Kusukela lapho isikolo obekufunda kuso isisulu sivaliwe, sakhitshwa laseluhlwini lwezikolo ezisemthethweni, ngenxa yokuthi besenqaba ukusebenzisana lamapholisa.
Khona manjalo kukhalwa langabanye abesilisa abatshengisa ukungazwelani lesisulu ngokuphosta imibhalo etshaqisayo. Minengi imibhalo esisabalale ezinkundleni zokuxhumana kubatshazwa isihluku salaba besilisa, abanye bephakamisa ukuthi bacetshwe ezindaweni abasebenza kuzo.
Izolo ngoMvulo, uNgqongqoshe wamaPholisa, uMnumzana Senzo Mchunu, ukuqinisekisile ukuthi utshitshanhloko laye usethathwe ulibofuzo (DNA) njengomunye wabathathwa njengabasolwa. UNgqongqoshwe wezeMfundo, uNkosikazi Siviwe Gwarube unxenxe umphakathi ukuba usebenzisane lohulumeni ekufundiseni izingane ngokuhlukunyezwa ngokocansi futhi zibike. Izinhlangano zepolitiki okubalwa kuzona i-IFP, i-EFF, iMKP, i-ANC, ne-Action SA nezinye, nazo zizwakalise ulaka lwazo ngalesi sehlakalo.-Ilanga
