admin
Wayne Ncube
INKAMPANI yeFarm and City Centre isixwayise abalimi ukuthi badinge ulwazi ngendlela zokufuya ezilobuchwepheshe ngoba zilakho ukuthuthukisa inzuzo yabo njalo zithembakele.
Ingcitshi kwezokulima kanye lokufuya uMnumzana Ray Shava wenkampani yeFarm and City Centre ukhuthaze abalimi ukuthi badinge ulwazi lwakulezinsuku osolutshintshe indlela zokufuya inkomo ezifana lokuhlanganisa imihlobo yenkomo ukuze kutholakaze umhlobo olenyama elonhlonzi kumbe ezehlisa kakhulu.
Ekhuluma lentatheli uMnu Shava uthe abalimi kabafunde ukuze bathole ulwazi lwe-bio-technology ngoba lulendlela ezinengi ezingena kwezokulima kugoqela ukuhlanganisa imihlobo yenkomo ngobuchwepheshe ukuze kuqinisekiswe inzuzo.
“Abalimi kusukela kudala bebezalisa inkomo zabo ngokufaka inkunzi ababebona ukuthi yiyo engumhlobo omuhle, kodwa khathesi ubuchwepheshe lobu obe bio-technology benza kuqinisekiswe ukuthi umlimi engahlanganisa imihlobo yenkomo eyehlukeneyo uthola umhlobo ofunakalayo ngaleso sikhathi.
“Ukusebenzisa i-bio-technology ukwenza ama-genetically modified organisms kusese kutsha elizweni leZimbabwe,” kulandisa uMnu Shava.
Kusukela ngesikhathi sika-1990 ubucwepheshe lobu lokhu bukhuliswa ukuze abalimi bathole inkomo ezilemali ngakho kusipha ulwazi lokuthi inkomo zakhona zifuna indawo enjani ukuze ziphile kakuhle.
Abalimi baxwayiswe ukuthi badinge ulwazi lolu ngoba belakho ukuthi bazithole beludinga ekuzithuthukiseni njengabo somabhizimusi kwezokulima.
Uphethe ngokugcizelela ukuthi abalimi bangathola inzuzo ephinda phindiweyo ngoba inkomo lezi eziphuma ngaphansi kohlelo lwe-bio-technology kazandisanga ukuphambuka kundlela ezikhangelelwe ukukhula ngayo.
“I-bio-technology iyaqinisekisa ukuthi nxa umlimi angahlanganisa umhlobo wenkomo oweBradford leBrahman uthola inkomo ezingezwa ukutshisa kakhulu njalo ezilenyama elohlonzi,” kuphetha uMnu Shava.
Online Reporter