Online Reporter
Ethel Ncube
AKUBIZWA okuzwayo esiJahundeni lapho okuzabe kukokotsha khona uMakhadzi ePhoenix Tshisanyama ngoMgqibelo.
UMakhadzi uzabe esesitikini loJah Signal lapho azabe ejabulisa abantu khona.
Intatheli ixhumane lomnikazi womcimbi lo uTapiwa Gandiwa obike ukuba uMakhadzi uzabe esestikini.
“Amalungiselelo wonke alumcimbi ahamba kuhle njalo sikhangelele ukuthi umhlabeleli odumileyo uMakhadzi uzabe ekhona. UMakhadzi useqinisekisile ukuthi uyabuya nukuzokwenza adume ngakho.
Uzabe etshintshana i-stage lomhlabeleli walapha eZimbabwe uJah Signal. Kuyabe kufiwa mahlabezulu, akumelanga likhuthe ukuya emcimbini lo. Abangakaze babone uMakhadzi ngamehlo lithuba lenu ukuba liyembona ehlabela egida ingoma zakhe limbone ngamehlo hatshi ukutshelwa,” kubika uGandiwa.
Uqhubekele phambili eveza ukuba unxusa wonke umuntu oseGwanda asondele kulumcimbi.
“Sinxusa uzulu oseGwanda ukuba asondele azozibonela hatshi ukutshelwa. Sililethela uMakhadzi eduze ukuba lijabule, buyani ngobunengi benu utshele umngane lomakhelwane ongazwanga ukuba uMakhadzi uyabe eqhunsa eGwanda ngoMgqibelo ziyabe zisiwa bahlali. Asigcwaleni ePhoenix lizojayiva lathi, uMakhadzi uliphathele uluju lodwa,” kuphetha uGandiwa.
