Online Reporter
Brandon Moyo
NGEMVA kokudlala leNgilandi lapho iZimbabwe enqotshwe khona kumdlalo weTest, uSikandar Raza uhle wagijimela eqenjini lakhe leLahore Qalanders, wafika wenza izimanga kumdlalo wokucina wePakistan Premier League (PPL).
Umdlali lo utshaye 22 runs kumabhola ayisikhombisa, wenelisa ukuncedisa ekuthi iLahore Qalandars ithwale inkezo yeligi, ebiyengesithathu kuleliqembu linqoba phezulu kweQuetta Gladiators.
ILahore Qalandars inqobe ngama-wicket ayisithupha.
Ngeviki edluleyo umdlali wamaChevrons lo wagada indizimtshina eqonde ePakistan ukuyancedisa iLahore Qalandars, qede lapho wabuyela eNgilandi ukuyadlalela ilizwe.
Bekusele ama-runs ayisitshiya galombili ukuthi umdlalo uphele, uRaza uhle wavuthela ibhola wafikisa angu-50, kusigaba sesibili sama-innings, watshaya ama-runs afike emgceleni enkundla ayisithupha, lamanye amane.
Kodwa-ke, uhambo lwakhe belungekho lula.
Kubikwa uRaza wasuka eNgilandi egade imota eyayitshelayelwa ngumngane wakhe, iqonde egcekeni lendizamtshina eBirmingham. Wagada indizamtshina ezimbili, enye yaqala ukumusa eDubai, andubana ayefika eLahore.
“Kumdlalo weTest leNgilandi ngajika ama-overs angu-50, ngatshaya ibhola ku 20 overs. Ngadla ukudla kwantambama eBirmingham, okwekuseni eDubai, emini ngadla e-Abu Dhabi. Ntambama ngadla ePakistan. Yiyo impilo yomdlali wekhilikithi. Ngiyakubongela ukuba lamathuba anje,” kutsho uRaza.
