admin
Thokozile Mbedzi
ZILOKHU zididekile izakhamizi zesigabeni seSwaithe eSigodini ngemva kokuba omunye umakorokoza edilikelwe ngumgodi ngeviki ephelileyo.
Kubikwa uDerick Mpofu oleminyaka yokuzalwa engu-18 ubegebha igolide ngaphansi komgodi ngesikhathi udiilika.
Ekhuluma lentatheli kaMthunywa uMnumzana Miniyothabo Nkiwane uthe umfana obesakhula wehlelwe liyezi elimnyama.
“Umfana lo ubegebha igolide phansi ngesikhathi umgodi udiilika. UMnumzana Norman Mathe yena ubephezulu elinde ukuthi amqhubele igolide. UMnu Mathe wezwa igodi selidilikela yikho ukubiza abanye abasebenza duzane labo ukuze bancedisane ukumkhupha loba bathi bemkhupha wayesevele esedlule,” kulandisa uMnu Nkiwane.
Usikhulumi samapholisa uInspector Loveness Mangena ebuzwa ngodaba lolu uthe udaba lolu solufikile ehofisini yabo.
“Sithanda ukuxwayisa uzulu ukuthi kekele umkhuba wokugebha okungekho emthethweni ukuze singalahlekelwa yimpilo mahlayana ,” kuphetha uInsp Mangena.
Online Reporter