admin
Thokozile Mbedzi
ZILOKHU zinkemile izakhamizi zesigabeni seBhalazeni Panning Site eSigodini ngemva kokuba omunye umakorokoza ehlahlelwe wafa ngesikhathi ezihambela lonkosikazi wakhe, uMthunywa ukuzwile lokhu.
Mhlaka 16 kuyonale inyanga uMnumzana Remember Moyo oleminyaka engu-61 lonkosikazi wakhe bahlangana lelinye inina basebebambisana indlela bengazi ukuthi bazakwehlukana sokunzima.
Kubikwa abathathu laba bathe besendleleni kwathutsha amadoda angaziwayo aqala ukubatshaya besithi kabalethe konke abalakho. Inina leli ababehamba lalo lenelisa ukuphunyuka labaleka kodwa uMnu Moyo lonkosikazi wakhe basala belokhu betshaywa.
UMthunywa uzwe ukuthi inina leli labuya selihamba labanye abantu kodwa bafica uMnu Moyo lonkosikazi wakhe besesimeni esibi bahle babagijimisela esibhedlela seSigodini kodwa badluliselwa eMpilo lapho uMoyo abhubhela khona.
Kubikwa unkosikazi kaMoyo ulokhu esesibhedlela.
Ekhuluma lentatheli kaMthunywa uNkosazana Sehlile Moyo uthe lakhathesi bayesaba ukuhamba ngoba bayabe becabanga ukuthi abantu balegolide kumbe imali.
“UMnu Moyo lomkakhe bebehlahlelwe bahlahlelwa ngamahloka lakho kwanceda lo omunye umama owenelisa ukuphunyuka, aluba baphuza ukuthola uncedo babezakufa bobabili. Indlela ababalimaza ngayo iveza ukuthi ngabantu abangela nembeza ngitsho,” uNkszn Moyo.
Isikhulumi samapholisa esabelweni seMatabeleland South uInspector Loveness Mangena ebuzwa ngodaba lolu uthe solufikile ehofisini labo njalo bacela uzulu ukuba azise amapholisa nxa bekhona abangaba lolwazi ngezikliwi lezi.
“Udaba lwendoda eganyulwe yalimala lonkosikazi wayo yacina isisifa esibhedlela isifikile ehofisini yethu ngakho sicela uzulu ongabe elolwazi lezikliwi lezi azise amapholisa aseduzane laye loba ukutshaya ucingo ukuze izigilamkhuba lezi zibotshwe,” kuphetha uInsp Mangena.
Online Reporter