admin
Mthokozisi Dube
UMQEQETSHI wabafana beFC Platinum uNorman Mapeza usebike ukuba akulalapho okuxega khona kuqembu lakhe kulandela ukuthi abadlali balwela ijesi ukuze bangene kuthimu yakuqala.
UMapeza uthe sokukhanya ukuba akula lapho enza khona iphutha ngesikhathi ekhankasa edinga abadlali bokungena labo kusizini yalonyaka nanko phela abadlali laba balichaya kubonakale ukuthi akudlalwa eZvishavane.
“Ngingumqeqetshi ongavumelani lokuthi kulethimu yakuqala lama-sub yikho ngabhalisa abadlali abangu-25.
Kungakho ubani lobani angadlala ngcono okuqakathekileyo yikuthi siphume enkundleni lemiklomelo eyiyo esiyabe siyafuna,” kuveza uMapeza.
UMapeza ubike ukuba yena njengomqeqetshi akala thimu yakuqala kumbe eyesibili, abadlali kumele bamsuthise ngesikhathi iqembu lilolonga.
Umdlalo weWhite City wenze iqembu leFC Platinum lalahlekelwa ngabadlali abambalwa ngenxa yokulimala ikakhulu unozinti uFrancis Tizayi yena ongabaphandle kwemidlalo ethize kulandela ukutshileka kwengalo yakhe.
“Ukulimala kuvele kukhona emdlalweni kodwa engingakutsho yikuthi iqembu lilabadlali abanengi kungakho yebo kuyabe kubuhlungu ukudlala ungela umdali kanti-ke lithuba elihle elokuthi abanye abadlali bangitshengise ukuba ngiyabe ngisenza amaphutha kodwa angilamdlali okuthiwa ngumfanami mina,” kubika uMapeza.
IPlatinum iphethe abadlali abaligiqa kamnandi ababalisa iIshmael Wadi , uObrey Chirwa loWellington Kamudyarirwa abakhangelelwe ukuba badlise amanye amaqembu imbuya ngoluthi kulisizini.
Abafana beFC Platinum batshiye iDeMbare inkemile nge 2-0 ukuze bathathe isigaba sesithathu. Emdlalweni wabo leHighlanders, iPlatinum yanqotshwa ngembekwa nge3-1 kulandela ukuthi amaqembu ayebe ngutshiki lobhanqa 1-1. Lumdlalo yiwo owakufakazayo njalo ukuthi inengi lamathimu alisoze liyephuma lula eMandava nxa ithimu le ingaqhubeka idlala ngale indlela.
Online Reporter