admin
Buhlebenkosi Gaule
INHLANGANISO ebona ngezifuyo eyeLivestock Production Department esabelweni seMatabeleland North ikhuthaza abalimi ukuthi basebenzise amanzi ngonanzelelo ngoba belakho ukuba lodubo lwamanzi ngenyanga kaMpandula.
UMnumzana Mike Nemashakwe onguLivestock Production Officer uthe abalimi ngenhloso yokunakekela izifuyo zabo kumele balondoloze amanzi ukuze izifuyo zabo zingacubi.
Uthe abalimi kumele banakekele izifuyo ngoba amanzi emalutshwana lonyaka kungakho balakho ukuphangisa ukubhekana lodubo lwamanzi okungenza izifuyo zicine zicuba masinya.
UMnu Nemashakwe uthe sebevakatshele kwezinye indawo esabelweni seMatabeleland behlola izifuyo.
“Lapho esengihambe khona ngibona ukuba izifuyo zikhangeleka njani, zikhanya zisesimeni esihle ikakhulu endaweni ezinjengeTsholotsho, kodwa lokhu akutsho ukuthi akulangozi yokuthi zicube,” kutsho uMnu Nemashakwe.
UMnu Nemashakwe uchaze ukuba abalimi kungenzakala ukuba baswele amanzi kunyanga kaMpandula ikakhulu endaweni zeTsholotsho, eBinga laseNkayi kungakho abalimi kumele basebenzise wonala amanzi akhona ngonanzelelo.
“Angila qiniso lokuba la amanzi esiwatholileyo lonyaka sizabe silokhe silawo kuze kuyefika isikhathi sezulu esilandelayo kuMfumfu, kufanele abalimi basebenzise amanzi ngonanzelelo njalo bagcinele izifuyo zabo amanzi,” nguMnu Nemashakwe.
Abalimi balakho ukuthengisa ezinye izifuyo zabo ukuze benelise ukuthola imali yokugebha imigodi yamanzi njalo lokhu kungabasiza ukuba besale lezifuyo abenelisa ukuzidingela ukudla kanye lamanzi.
UMnu Nemashakwe uphethe ngokuxwayisa abalimi ukuba nxa izifuyo zabo sezisiyadinga amadlelo kwezinye indawo bananzelele ngoba yikho lapho izifuyo ezibuya khona lemikhuhlane etshiyeneyo.
Online Reporter