admin
LOBA isigaba sokuna kwezulu sisanda kusungula njalo ebantu belijabulela ngoba lokhu kutsho ukuba abalimi sebengena emasimini ukuyasebenza kuyadanisa ukuba indaba zokona kwenkosazana endaweni ezitshiyeneyo zelizwe seziqalile ukuphuma kumaphephandaba.
Kuviki ephelileyo ngoLwesihlanu sizwe ngokona kwenkosazana eHarare lapho okubikwa abafundi ababili batshaywa yinkosazana bevela esikolo bahle bedlula.
Kukanti kusehlakalo sesibili kuvele ukuba izibotshwa ezivalelwe ejele yeHwange ezingu-13 lazo zatshaywa yinkosazana ngesikhathi zisidla ukudla kwazo kwemini.
Izibotshwa lezi kubikwa zalimala kakhulu okwenza zagijinyiselwa esibhedlela esiseduzane kukanti ezine ezalimala kakhulu zadluliselwa koBulawayo esibhedlela seMpilo.
Okusuke kusidabule inhliziyo yikuthi kambe inkosazana nxa izathi isigaba sezulu sisungula ihle iqale ukona lapha lalaphaya pho sisiyafika emaphethelweni nxa kungenziwanga lutho izabe yone kanganani.
NgeSonto kule iviki njalo iphindile njalo eMasvingo lapho inkosazana etshaye enye indoda ebihamba lomkayo emkambo wedlula.
Ngalokhu thina njengoMthunywa sithi kulezi izimuli ezisosizini oludabula inhliziyo kangaka, sikhala sonke sithi uMvelingqangi wenze intando yakhe.
Silokukhathazeka okukhulu ngalokhu osokusenziwa yinkosazana elizweni lakithi. Konakale ngaphi kambe bakaMthwakazi? Sikhuthaza abadala abazi ngezamasiko ukuthi bake bahlanganise amakhanda bahluzisise ngalinsindabaphenduli eyehlele ilizwe lethu. Hlezi ukona kwenkosazana kumemetheke kuze kuphose kuqede isizwe sonke ngoba phela inengi labantu lingabona ukuthwala kwezulu lihle liqale ukuhlalela evalweni.
Sikhuthaza lamabandla ezokholo labosiyazi ukuthi bake bazame icebo lokudingisisa ngembangela yalokhu, phela inkukhu iyawusola umumbu. Izikolo lazo sizikhuthaza ukuthi ngesikhathi nxa bebona ukuthwala kwezulu, baphange bakhuthaze abantwana ukuthi basuke ngaphansi kwezihlahla ngoba esikhathini esinengi yizo ezandise ukutshaywa yinkosazana.
Okunye abantwana kumele bahlale emakilasini bachume bangagcwali indawana yonke ngoba konke lokhu kubenza babesengozini.
Izolo vele angithi besifundiswa ukuthi nxa izulu elikhulumayo lisina kumele sihlale phansi sichume hlezi ulaka lwalo lwehlele emuntwini. Kungumbono kaMthunywa ukuthi kubalulekile ukuthi izikolo zifundise abantwana ngengozi yenkosazana ukuze kuthi lanxa seliqala ukuna izulu bakwazi ukuthi bangazivikela ngokuba sendaweni ezinjani.
Umlandu usukithi sonke bakaMthwakazi ekunanzeleleni lasekuqapheleni abantwana emakhaya ngesikhathi nxa izulu lisina.
Izihlahla ezisemphakathini ezake zatshaywa yinkosazana kumele zitshiswe njalo ezinye okumele ziganyulwe yilezi ezingabe zafela umuntu mhlawumbe ngokuzibophela kumbe ngeyinye ingozi enjalo.
Online Reporter