Online Reporter
KUYINTO ebuhlungu kakhulu ukuthi kulezinsuku abantu sebebulala ilizwe lethu ngokuphatheka ebuqilini obutshiyeneyo.
Yebo kungabe kuliqiniso ukuthi izinto zijikile emadolobheni nanko lemitshova isikhuphule imali yokugada, imali eziholwa ngabantu zilokhe zifanana zingatshintshanga kodwa lokhu akutsho ukuthi ukuze umuntu athole ukuziphilisa kumele enze okungaphandle komthetho.
Phela kulezinsuku phose wonke umuntu ulakho akwenza ensitha okungaphandle komthetho njalo lokhu kutshengisela ukuthi ngempela abantu sebephambanisekile. Izisebenzi zemankampanini ehlukeneyo ziphuma ziphambana emthethwandaba ngamacala obugwelegwele abawenzayo zisithi ziyakhwabanisa kodwa ziphambanisa intuthuko yelizwe lakithi.
Banengi abantu kuleli ababanjwa besenza okungekho emthethweni; abanye bathengisa izidakamizwa abanye basebenzisa amabizo amankampani abawasebenzelayo ukuqila abantu izimali.
Ngempela inengi labantu selicabanga ngokuziphilisa ngokwephula umthetho njengoba izinto ezinengi sezibiza imali ephezulu.
Abanye sebengabatshontsha impahla yemsebenzini, abanye njalo ngabakhweza intengo yempahla besenzela ukuthi batshontshe imali. Kuthi ke abanye labo sebephila ngokuzidlela imali zemsebenzini.
Kambe Mthwakazi, ilizwe lingathuthuka na nxa abantu bephethe bengcolisa ilizwe lethu?
Kuyadingeka-ke ukuthi njengoba iphalamende isivuliwe njalo uMongameli welizwe uKhomuredi Emmerson Mnangagwa esecande indlela ngombono kaVision 2030. Kukhangelelwe ukuthi ngalindlela abaphathintambo basebenze ngokuzimisela ukuze umnyaka ka 2030 uthi usiyafika sesilomkhonomi ophakathi laphakathi.
Kuyadingeka ukuthi njengoba uHulumende eseveze ukuthi ufuna kube lenguquko elizweni asibambaneni njengezizalwane zakuleli sisebenze ndawonye siphakamise umkhonomi welizwe lethu.
Kungaba kuh0le uma umuntu wonke angazipha umlandu wokuthi alungise ilizwe lethu, sibulale imvukuzane yobugwelegwele ebisingene kuleli.
Akusoze kubelula ukuthi sithole ukuhlala kuhle ngokuphangisa kodwa kudingeka ukuthi sizimisele ukulwisana lobubi obenzakalayo.
Kambe angithi sonke nje singazama ukuhamba ngendlela eyiyo izinto zingalungiseka siphakamise ilizwe lethu.
Kulicebo elihle ukuthi sibambisaneni sonke njengezizalwane zelizwe leZimbabwe ukuthi silithuthukise lezitha zethu ziswele okubi ezingakukhuluma ngathi.
