admin
NANKU umnyaka omutsha ususezinyaweni zethu, amalungiselelo okuthabela lelilanga asephelele. Amawayilesi azakhala aze ahawule kugidwa ingoma zokuphela komnyaka kuze kuse. Amhlophe! Amhlophe sizwe esihle!
Kwabanengi ukuqala komnyaka omutsha kutsho ukukhangela emuva kumnyaka asebewutshiya, bekhangela phela ukubana kungaki okuhle lokubi abakwenzileyo.
Phela inyanga ezilitshumi lambili azisizo zokudlala ngazo, kunengi okwenzakalayo.
Abanye batshadile, abanye balobolile, abanye bathenge izimota lenye impahla edulayo kanti abanye njalo babonane lezihlobo ababengazazi ngitsho lokuthi zisaphila abanye bathola abangane.
Abanye njalo bakhangela umnyaka ka2021 zehle ezimathonsi ngoba ubathathele abazali, izithandwa zabo lezinye izihlobo.
Abanye bayazisola baze bafise ukuthi ngabe bayaphiwa ithuba lokubuyela bagijime bayelungisa izikhexe abazitshiyileyo. Akusenani usudlule lo umnyaka.
Kuhle-ke ukuthi esikwenzileyo ngomnyaka ka2021 kube yisifundo esizasisebenzisa kumnyaka omutsha.
Abadala bathi impilo ifana losane olufundela ukuhamba, luyawa lubuye luvuke njalo luzame lubuye luwe njalo.
Abantu abalukhangeleyo bayabe beluhleka kodwa alwaze lwalahla ithemba lokuthi luzahamba. Luthi loba lusiwa luvuke luzame luze lwenelise ukuzihambela.
Kuyafana-ke lasempilweni, bakhona abawe kanengi besehluleka lapha lalaphaya, besilwa labantu babuye njalo bazisole nxa behlakaniphile, lababantu bazakwenza kuhle ngomnyaka omutsha ngoba besazi lapho abaphambanise khona.
Labo abenze kuhle silitshayela ihlombe bakithi, akuqhubeke kunjalo kumnyaka omutsha.
Kuviki edluleyo sike saxoxa ngosuku lweUnity Day okulusuku olukhulu kumbali yelizwe leZimbabwe lapho abakhokheli bamabandla amabili ababambana khona kwakhunyiswana umlotha.
Singabe sibophelane inhliziyo lezihlobo kumbe labangane bethu okwesikhathi eside asisoze sithole ukujabula nxa singaxolelananga.
Uzwa omunye esithi, “angixolisi mina, nguye omele acele uxolo kimi manje nxa ethembe ukuthi uzangibona ngimguqela uzakhawula.” Hatshi bo akumelanga kube njalo.
Ocela uxolo ayisuye oyabe ephambanisile ngasikhathi sonke. Lophanjanisiweyo ulakho ukucela uxolo ukuze kubhulwe umlilo benelise ukukhumisana umlotha.
Ocela uxolo usala enhliziyo imhlophe angathi ukhiphe umlandu enhliziyweni kukanti lo ocelwayo ulakho ukusala ezisola ecabanga ukuba kuyini okwenze umuntu lo weza kuye.
Kodwa-ke konke lokhu akulani kangako, abantu kumele bafunde ukuhlalisana lokuphilisana bethandana hatshi ukuzondana baze bangene omunye umnyaka bengakhulumisani.
Silifisela konke okuhle ngomnyaka omutsha bantu bakithi sengathi konke elikufisayo empilweni zenu lingakuthola ngo 2022.
Online Reporter